شرقپور شریف ( این این آئی) شرقپور شریف میں باپ نے غیرت کے نام پر دو جوان بیٹیوں کو قتل کر دیا، لڑکیوں کو کرنٹ لگنے کا ڈرامہ رچا کر وقوعہ کے روز ہی تدفین بھی کر دی ۔پولیس کے حوالے سے بتایا گیا ہے کہ بھوئے ڈھکو شرقپور شریف کے اعظم علی کی بیٹیوں نرما اور عروج کے کردار کے حوالے سے اہل علاقہ باتیں کرتے تھے ۔اعظم نے اپنی بیٹیوں نرما اورعروج کو زہر دینے کے بعد کرنٹ لگانے کے بعد قتل کر دیا ۔ والدہ کی جانب سے درج کرائی گئی ایف آئی آر کے مطابق وہ چارہ لینے کے لئے گائوں سے ملحقہ کھیت میں گئی اور جب گھر واپس آئی تو دونوں بیٹیاں گھر کے اندر زمین پرمردہ حالت میں پڑی ہوئی ہیں جبکہ میرا خاوند اعظم صحن میں بیٹھا ہوا تھا ۔
اعظم نے مجھے بتایا کہ بیٹیوں کو غلط کردار کے حوالے سے متعدد بار منع بھی کیا مگر وہ باز نہیں آئیں ،اہل محلہ مجھے اس بارے میں مختلف باتیں کرتے ہیںجو کہ مجھ سے برداشت نہیں ہوا اور میں نے دونوں بیٹیوں کو زہر دے کر اور کرنت لگا کر قتل کر دیا ۔اعظم نے مجھے دھمکی دی کہ اگر تم نے کسی کو بتایا تو میں تمہیں بھی مار دوںگا۔ ہمارے شوہر کرنے پر اہل محلہ اکٹھے ہو گئے جنہیں ہم نے بتایا کہ ہماری بیٹیاں کرنٹ لگنے سے مر گئیں اور اسی رات دونوں کی تدفین بھی کر دی گئی ۔بتایا گیا ہے نرما شادی شدہ جبکہ عروج کنواری تھی ۔بتایا گیا ہے کہ ایک ہمسائے کی طرف سے شک گزرنے پر پولیس کو اطلاع دی گئی جس کے بعد والدہ مسرت کی مدعیت میں مقدمہ درج کر کے ملزم کی تلاش شروع کردی گئی ۔
