کراچی(این این آئی) پاسپورٹ بنوانے والوں کیلئے نئی مشکل کھڑی ہوگئی ہے۔ذرائع کے مطابق پاسپورٹس اینڈ امیگریشن آفس میں لیمینیشن پیپر کے معاملے پر پاسپورٹ کی پرنٹنگ پہلے ہی تاخیر کا شکار تھی اور اب اگر محکمہ کے اعلی افسران سیاہی کی کمی کو پورا نہیں کرتے ہیں تو شہریوں کو پاسپورٹس کے اجرا میں مزید تاخیر کا خدشہ ہے۔

اعلی حکام ڈائریکٹوریٹ آف پاسپورٹس اینڈ امیگریشن کی حیثیت کو اتھارٹی میں تبدیل کرنے کا ارادہ رکھتے ہیں، اس لیے یہ مسائل پیدا ہو رہے ہیں۔یاد رہے کہ گزشتہ ہفتے حکومت نے پاسپورٹس بنوانے میں پیش آنے والی مشکلات کو ختم کرنے کے لیے پاسپورٹس پرنٹ کرنیوالی نئی مزید مشینیں منگوانے کا فیصلہ کیا تھا۔حکام کے مطابق نئی مشینوں میں 6 ڈیسک ٹاپ، 2 ای پاسپورٹس مشینیں منگوائی جائیں گی، نئی مشینیں 1 گھنٹے میں ایک ہزار پاسپورٹس پرنٹ کی صلاحیت رکھتی ہیں۔