لاہور ( این این آئی)وزیر اعظم کے مشیر برائے سیاسی امور ومسلم لیگ (ن) کے سینئر رہنما رانا ثنا اللہ نے سپریم کورٹ کے مخصوص نشستوں سے متعلق فیصلے پر رد عمل دیتے ہوئے کہا کہ تحریک انصاف کو وہ ریلیف دیا گیا جومانگا ہی نہیں تھا،ایسے فیصلے ملک کے حق میں نیک شگون نہیں ہوتے۔انہوں نے نجی ٹی وی سے گفتگو کرتے ہوئے کہا کہ آئینی ترمیم کی طرف اس وقت جایا جاسکتا ہے جب پارلیمنٹ میں اتفاق رائے ہوگا، اس فیصلے سے وفاق اور تینوں صوبوں پر فرق نہیں پڑے گا، وفاق اور تینوں صوبوں میں نمبرز پورے ہیں۔

انہوں نے کہا کہ ایسے ریلیف اور فیصلے ملک پر بہت بھاری پڑے ہیں ، تفصیلی فیصلہ آئے گا تو اس کو پڑھ کر بات ہوگی، ایسے فیصلوں میں پنڈورا باکس کھلتا ہے تو وہ مناسب بات نہیں ہوتا کیا ہے آنے والا وقت بتائے گا۔راناثنااللہ نے کہا کہ ہماری قانونی ٹیم سپریم کورٹ فیصلے کا جائزہ لیرہی ہے، اس نکتے پر فیصلہ کریں گے اپیل میں جایاجائے یا نہیں تاہم حکومت سپریم کورٹ کے فیصلے کو تسلیم کرتی ہے۔