کراچی(این این آئی) گلشن معمار میں سو روپے کی شرط لگا کر سرکہ کی بوتل پینے سے کلاس 2 کا طالبعلم جاں بحق ہوگیا۔تفصیلات کے مطابق گلشن معمار کے علاقے افغان کیمپ میں ایک لڑکا جاں بحق ہوگیا جس کی لاش عباسی شہید اسپتال منتقل کی گئی جہاں متوفی کی شناخت 11سالہ شاہ محمد ولد شیر خان کے نام سے ہوئی۔پولیس حکام کے مطابق 11 سال کے متوفی بچے کے استاد حمیداللہ نے عباسی شہید اسپتال میں میڈیا سے گفتگو کرتے ہوئے کہا کہ گلی میں نمکو والے دکاندار نظام الدین نے شاہ محمد سے شرط لگائی تھی کہ اگر تم سرکہ پی جائو گے تو تمہیں سو روپے دونگا۔
بچے نے جذبات میں آکر سرکہ پی لیا۔انہوں نے کہا کہ شاہ محمد نے سرکے کی بوتل پینے کے بعد ٹھیلے والے سے شرط کے 100 روپے لیے اور دکان پر گیا، کولڈ ڈرنک خرید کر پی لی، لڑکا گھر آیا تو اسے الٹیاں شروع ہوگئیں۔حمیداللہ نے بتایا کہ بچے نے بتایا کہ اس نے سرکے کی بوتل اور پھر کولڈ ڈرنک پی لی ہے، شاہ محمد کو اسپتال منتقل کیا گیا لیکن وہ انتقال کر گیا۔پرنسپل کے بیان کے بعد پولیس نے نظام الدین کو حراست میں لے لیا ہے، بچے کی لاش کو پوسٹ مارٹم کے لئے اسپتال منتقل کیا گیا ہے۔پوسٹ مارٹم رپورٹ کے بعد وجہ موت سامنے آسکے گی، واقعے سے متعلق مزید تفتیش کا عمل جاری ہے۔
