اسلام آباد (نیوز ڈیسک) بشکیک سے لاہور پہنچنے والے طلبا نے وفاقی وزیر داخلہ محسن نقوی سے پاکستانی سفیر حسن علی ضیغم کی شکایت کردی۔ تفصیلات کے مطابق گزشتہ رات کرغزستان سے 180 مسافر لاہور پہنچے جن میں 30 طلبا بھی شامل تھے۔ وفاقی وزیر داخلہ محسن نقوی نے طلبا کا استقبال کیا۔

اس موقع پر گفتگو کرتے ہوئے ایک طالبعلم نے کہا کہ کرغزستان میں ہمیں جو مشکلات پیش آئیں وہ اپنی جگہ، لیکن ہمیں اس وقت زیادہ دکھ ہوا جب پاکستانی سفیر حسن علی ضیغم نے کہا کہ حالات نارمل ہیں۔ پاکستانی طالبعلم کا کہنا تھا کہ بشکیک میں حالات انتہائی خراب ہیں، اور پاکستانی سفیر مسلسل جھوٹ بولتے رہے کہ سب کچھ ٹھیک ہے۔