اسلام آباد (نیوز ڈ یسک)پاکستانی شوبز انڈسٹری کی سینئر اداکارہ بشریٰ انصاری کے شوہر اقبال حسین حالیہ ٹی وی انٹرویو کے بعد سوشل میڈیا پر توجہ کا مرکز بن گئے ہیں۔
دونوں میاں بیوی نے ایک نجی چینل کی خصوصی رمضان نشریات میں شرکت کی جہاں گفتگو کے دوران اقبال حسین کے بعض دلچسپ اور غیر روایتی بیانات نے صارفین میں بحث چھیڑ دی۔انٹرویو میں انہوں نے مزاحیہ انداز میں کہا کہ انہیں کم عمر لڑکیاں کبھی متاثر نہیں کرتیں بلکہ وہ ہمیشہ عمر میں بڑی خواتین کو زیادہ پسند کرتے رہے۔ انہوں نے ہنستے ہوئے ایک پرانا واقعہ بھی سنایا کہ دوستوں کے گھروں میں مذاقاً کہا کرتے تھے کہ بہنوں کو ایک طرف کر دیں کیونکہ انہیں تو ماؤں سے خطرہ ہوتا ہے، جس پر سب لوگ ہنسی مذاق میں اپنی ماؤں کو چھپا لیتے تھے۔اقبال حسین نے یہ بھی بتایا کہ وہ خود کو روایتی ازدواجی زندگی کے لیے موزوں شخصیت نہیں سمجھتے تھے کیونکہ ان کی طبیعت آزاد مزاج اور قدرے بے قید رہی ہے۔ ان کے مطابق کم عمری سے ہی ان کی سوچ سنجیدہ اور پختہ تھی، اسی وجہ سے ذہنی ہم آہنگی عموماً ان سے بڑی عمر کی خواتین کے ساتھ زیادہ محسوس ہوئی۔گفتگو کے دوران انہوں نے انکشاف کیا کہ وہ طویل عرصے سے بشریٰ انصاری کو پسند کرتے تھے، مگر ابتدا میں شادی کا ارادہ نہیں رکھتے تھے۔ ان کے بقول اداکارہ اکثر انہیں مختلف رشتوں کی تجاویز دکھاتی تھیں۔
ایک موقع پر انہوں نے مزاحاً کہا کہ اگر وہ انہیں شادی شدہ دیکھنا چاہتی ہیں تو خود ہی کیوں نہ ان سے شادی کر لیں۔ بعد میں یہی بات سنجیدہ رخ اختیار کر گئی، انہوں نے باقاعدہ رشتہ بھیجا اور یوں دونوں نے ازدواجی زندگی کا آغاز کیا۔
