اسلام آباد (نیوز ڈ یسک) وزیرِ اعلیٰ پنجاب مریم نواز نے اعلان کیا ہے کہ اپریل سے “اپنا کھیت، اپنا روزگار” پروگرام کے تحت کاشتکاروں کو سرکاری زمین بلا معاوضہ فراہم کی جائے گی۔

سوشل میڈیا پلیٹ فارم ایکس پر جاری بیان میں انہوں نے بتایا کہ اس اسکیم کے تحت صوبے کی قابلِ کاشت سرکاری اراضی کسانوں کو دس سالہ لیز پر دی جائے گی۔ ہر مستحق کاشتکار کو پانچ ایکڑ زمین دی جائے گی اور اس کے عوض کوئی فیس یا رقم وصول نہیں کی جائے گی۔ مزید یہ کہ کسانوں کو مالی معاونت بھی دی جائے گی تاکہ وہ فوری طور پر زرعی سرگرمیاں شروع کرسکیں۔یاد رہے کہ 4 فروری کو راجن پور میں الیکٹرو بس منصوبے کی افتتاحی تقریب سے خطاب کرتے ہوئے وزیرِ اعلیٰ نے اسی منصوبے کا ذکر کیا تھا اور کہا تھا کہ اس پروگرام کے تحت تقریباً ڈھائی لاکھ ایکڑ زمین کم آمدنی والے افراد میں تقسیم کی جائے گی۔