لاہور( این این آئی )غیر قانونی طور پر پاکستان سے بھارت جانے والی سیما حیدر کے ہاں چھٹے بچے کی پیدائش ہوئی ہے،

خاتون کے ہاں گزشتہ برس بیٹی کی پیدائش ہوئی تھی۔بھارتی میڈیا رپورٹس کے مطابق پاکستانی خاتون سیما حیدر اور ان کے بھارتی شوہر سچن ایک بار پھر والدین بن گئے، ان کے ہاںبیٹے کی پیدائش ہوئی ہے، ماں اور بچہ دونوں خیریت سے ہیں۔میڈیا رپورٹس کے مطابق یہ گزشتہ 11ماہ کے دوران ان کے ہاں دوسرا بچہ ہے، اس سے قبل 15 مارچ 2025 کو سیما حیدر نے بیٹی کو جنم دیا تھا۔میڈیا رپورٹ کے مطابق منگل کے روز ہسپتال سے ڈسچارج ہونے کے بعد سیما حیدر اپنے گھر ربھوپورہ واپس پہنچیں جہاں سچن مینا کے اہلِ خانہ نے خوشی کا اظہار کیا۔یاد رہے کہ سیما حیدر اپنے 4بچوں کے ہمراہ 2023 میں پاکستان سے نیپال کے راستے غیر قانونی طور پر بھارت میں داخل ہوئی تھی۔

بھارتی ریاست اتر پردیش کے رہائشی سچن مینا اور اس کی ملاقات 2019 میں ایک آن لائن گیم کے ذریعے ہوئی تھی، دونوں نے آن لائن بات چیت شروع کی جو رفتہ رفتہ محبت میں بدل گئی تھی۔