اسلام آباد (این این آئی)محکمہ موسمیات نے رواں ہفتے گرمی کی شدت بڑھنے کی پیشگوئی کر دی۔نجی ٹی وی سے گفتگو میں چیف میٹرولوجسٹ شاہد عباس نے کہا کہ اگلے7روز لاہور میں بارش کا امکان نہیں، جمعہ سے درجہ حرارت 45 ڈگری تک جائے گا۔دوسری جانب ملک کے بیشتر میدانی علاقوں میں شدید گرمی کی لہر جاری ہے۔

45 ڈگری پارے کے ساتھ دادو اور تربت ملک کے گرم ترین مقامات رہے۔ آج بھی میدانی علاقوں میں غضب کی گرمی پڑے گی۔سکھر، سبی اور موہنجوداڑو میں گرمی کی شدت 43، نوابشاہ اور مٹھی میں 42 ڈگری سینٹی گریڈ ریکارڈ کی گئی۔ جنوبی پنجاب میں بھی سورج آپے سے باہر ہے۔ ڈی جی خان اور ملتان ریجن بھی شدید گرمی کی زد میں ہے۔طبی ماہرین نے شہریوں کو مشورہ دیا ہے کہ وہ باہر نکلتے ہوئے احتیاط کریں، دوپہر کے اوقات میں سرڈھانپ کرنکلیں اور پانی کا زیادہ سے زیادہ استعمال کیا جائے۔