اسلام آباد (این این آئی)آئندہ مالی سال 2023-24ء کے وفاقی بجٹ میں عوام کیلئے مزید مشکلاٹ بڑھنے کا امکان ہے۔نجی ٹی وی کے مطابق بجٹ میں بجلی اور گیس کی سبسڈی مزید کم کرنے پر غور کیا جا رہا ہے جس سے بجلی و گیس صارفین کی مشکلات میں اضافہ ہو سکتا ہے۔ذرائع کے مطابق توانائی کی سبسڈی 1575ارب سے کم کر کے 975ارب روپے کرنے کی تیاری کی جا رہی ہے جب کہ بجلی کی سبسڈی صرف لائف لائن صارفین تک محدود کرنے کی تجویز دی گئی۔

مالی سال کے دوران بجلی 28فیصد مہنگی ہونے کا خدشہ ہے، بجلی سہ ماہی بنیادوں پر7فیصد مہنگی کرنے پر غور کیا جا رہا ہے، دوسری جانب گیس 22فیصد مہنگی ہونے کا بھی خدشہ ہے۔ذرائع کے مطابق حکومت ٹیکسوں، سبسڈی ختم کرکے بجٹ اہداف حاصل کرنا چاہتی ہے، سبسڈی ختم ہونے سے مہنگائی کے تمام ریکارڈ ٹوٹ سکتے ہیں، بیرونی قرض نہ ملنے سے حکومت کا بجٹ اہداف حاصل کرنا مشکل ہے۔