پشاور (مانیٹرنگ ڈیسک)پاکستان تحریک انصاف کو پشاور ہائیکورٹ سے بڑا ریلیف مل گیا، 479 کارکنان رہا کر دیئے گئے۔

نجی ٹی وی ڈان نیوز کے مطابق 9 مئی کے واقعات کے بعد پکڑے گئے کارکنان کی گرفتاریاں کالعدم قرار دے دی گئیں، پشاور ہائیکورٹ میں تھری ایم پی او کے تحت گرفتاریوں کے خلاف درخواست دائر کی گئی، عدالت نے دونوں جانب سے وکلا کے دلائل سننے کے بعد تھری ایم پی او کا نوٹیفکیشن کالعدم قرار دیتے ہوئے 479 کارکنان کو رہا کرنے کی ہدایت کر دی۔

خیبرپختونخوا پولیس کے مطابق جلاؤ گھیراؤ کے مقدمات میں مجموعی طور پر 2528 افراد کو گرفتار کیا گیا تھا، ان میں سے 479 ایسے افراد تھے جن کو تھری ایم پی او کے تحت حراست میں لے کر جیلوں میں ڈال دیا گیا تھا تاہم پشاور ہائیکورٹ کے حکم کے بعد ان کی رہائی عمل میں لائی جائے گی۔