کراچی (مانیٹرنگ ڈیسک)لانڈھی کے علاقے میں ہونے والی واردات کی ویڈیو وائرل ہو گئی ہے جس میں دیکھا جا سکتا ہے کہ موٹر سائیکل سوار اسٹریٹ کریمنلز خاتون کے ساتھ لوٹ مار کررہے ہیں، اس موقع پر خاتون کی منت سماجت اور ہاتھ جوڑنے پر لٹیروں کو رحم آ گیا اور انہوں نے خاتون سے تشدد کے بعد چھینا ہوا پرس واپس کردیا اور فرار ہوگئے، واقعے کی سی سی ٹی وی فوٹیج سوشل میڈیا پر وائرل ہو گئی۔
نجی ٹی وی کے مطابق ویڈیو میں ایک موٹر سائیکل پر سوار 2 ملزمان آئے اور پیدل چلنے والی خاتون اور بچے کے سامنے موٹر سائیکل روکی اور خاتون سے پرس چھیننے کی کوشش کی، جس پر خاتون نے مزاحمت کرنے کی کوشش کی۔ اس موقع پر ایک ڈاکو نے بیگ چھیننے کی کوشش میں خاتون پر تشدد بھی کیا، خاتون نے اپنا بیگ ان سے دور پھینک دیا لیکن وہ اسے حاصل کرنے میں کامیاب ہو گئے، اسی دوران ڈاکوؤں کے مزید دو ساتھی بھی پہنچ گئے اور فرار ہوتے وقت خاتون نے ان کی منت سماجت کی اور ان کے آگے ہاتھ جوڑے جس پر انہیں خاتون پر رحم آ گیا اور پرس واپس کرکے وہاں سے چلے گئے۔
