لاہور ، اسلام آباد(مانیٹرنگ ڈیسک ،این این آئی )نیب اسلام آباد نے القادر ٹرسٹ کیس میں عمران خان کی اہلیہ بشریٰ بی بی کو کل طلب کرلیا۔ذرائع کے مطابق نیب کی تین رکنی ٹیم القادر ٹرسٹ کیس میں جاری نوٹس بشریٰ بی بی کو دینے کے لیے زمان پارک پہنچی تھی۔

ذرائع کا کہنا ہےکہ نیب کی ٹیم دو گھنٹے زمان پارک میں عمران خان کے گھر میں موجود رہی جسے بتایا گیا کہ پی ٹی آئی کی لیگل ٹیم یہ نوٹس وصول کرے گی۔ذرائع کے مطابق نیب ٹیم مسلسل انتظار کرنے کے بعد پی ٹی آئی کی لیگل ٹیم سے نہ مل سکی اور نوٹس موصول کرائے بغیر واپس چلی گئی۔ذرائع کا کہنا ہےکہ نیب کی ٹیم نوٹس موصول کرانے دوبارہ زمان پارک آئے گی۔

دوسری جانب سابق وفاقی وزیر فیصل واڈا نے کہا ہے کہ پہلے بھی کہا تھا کہ یہ عمران خان کو بند گلی میں لے آئیں گے، اب اس بند گلی میں آچکے ہیں۔اپنی ٹوئٹ میں انہوں نے کہا کہ آج سے کیڑے اور سانپ پہلے 9 مئی کا شرمناک واقعہ کروانے کے بعد مذمتی بیان دیں گے، دوسرے فیز میں پارٹی سے لاتعلقی اور ملبہ دوسرے پر ڈال دیں گے۔انہوں نے کہا کہ پہلے بھی کہا کہ یہ عمران خان کو بند گلی میں لے آئیں گے اور اب اس بند گلی میں آچکے ہیں، جس سے اللہ نکال سکتا ہے بندہ نہیں۔