کراچی (مانیٹرنگ ڈیسک) عمران خان کو پتہ ہی نہیں ریاست مدینہ کیا ہے، سینئر صحافی حسن نثار ایک مرتبہ پھر وزیراعظم عمران خان پر برس پڑے، جیو نیوز کے پروگرام میں بات کرتے ہوئے انہوں نے کہا کہ پاکستان کا اقتصادیات کا مسئلہ بھی دراصل اخلاقیات کا ہوتا ہے، عمران خان نے ٹھیک کہا ہے لیکن پتہ نہیں اسے سمجھ ہے بھی یا نہیں، ہم جیسے معاشروں میں اخلاقیات کو چند سطحی چیزوں کے ساتھ کنفیوژ کیا جاتا ہے، اپنے کام کو ترجیح دینا، اچھے کام پر فخر کرنا، جھوٹ نہ بولنا، ملاوٹ نہ کرنا،
بددیانتی نہ کرنا اور ڈسپلن یہ سب اخلاقیات کا حصہ ہیں۔ سینئر صحافی نے کہا کہ عمران خان ریاست مدینہ کی بات کرتے ہیں، انہیں پتا ہی نہیں ریاست مدینہ کیا ہے، حسن نثار نے کہا کہ ریاست مدینہ بنیادی طور پر آدمی کو انسان بنانا ہے، ہمارے نام نہاد سیاسی لیڈروں کا گھٹیا پن اس سطح پر ہے کہ کہتے ہیں میرے اثاثے میری آمدنی سے زیادہ ہیں تو کسی کو کیا تکلیف ہے۔ حسن نثار نے کہا کہ کل ن لیگ والوں نے یوسف رضا گیلانی کو نااہل کروایا اور آج ان کے سینیٹر بننے پر خوشیاں منا رہے ہیں۔
