راولپنڈی(این این آئی)تھانہ مندرہ کے علاقے کوری دولال میں 15 سالہ لڑکے نے اپنے ہی بڑے بھائی اور بہن کو مار دیا اورماں کو زخمی کر دیا۔ راولپنڈی مندرہ کے علاقے کوری دولال میں بدبخت بھائی نے اپنے بڑے بھائی اور بہن کو فائرنگ کرکے مار دیا جب کہ ماں کو شدید زخمی کردیا، اور موقع سے فرار ہوگیا۔
پولیس کے مطابق اورنگزیب کے اہل خانہ رات کو معمول کے مطابق سوئے لیکن صبح کمروں میں 24 سالہ حسن زیب اور 18 سالہ عاصمہ اورنگزیب مردہ حالت میں ملے، ان کی والدہ نصیراں شدید زخمی حالت میں بے ہوش ملی، پولیس نے دونوں مُردوں کو تحویل میں لے کر فرانزک ٹیم کے ذریعے شہادتیں اکٹھی کرکے پوسٹ مارٹم کے لیے ہسپتال منتقل کردیں۔ایس ایچ او مندرہ یاسر محمود عباسی نے کہا کہ ابتدائی تفتیش میں انکشاف ہوا ہے کہ مقتولین کو ان کے 15 سالہ حقیقی بھائی احسن نے فائرنگ کرکے مار دیا اور فائرنگ میں اس کی والدہ بھی زخمی ہوگئی، موقع سے فرار ہوگیا، ملزم نویں جماعت کا طالب علم ہے اور بظاہر قتل گھریلو رنجش کا شاخسانہ لگتا ہے، تاہم تفتیش میں مزید صورتحال واضع ہوجائے گی، پولیس نے ملزم کی گرفتاری کے لئے چھاپے مار نے شروع کر دیے ہیں۔ میڈیا ذرائع کے مطابق پندرہ سالہ ملزم احسن زیب کے بارے میں علاقہ مکینوں کا کہنا ہے کہ وہ گیمز کھیلنے کا بہت زیادہ شوقین تھا جس پر اس کے بہن بھائی اور گھر والے مخالفت کرتے تھے اور اس اپنی پڑھائی پر توجہ دینے کے لئے کہتے تھے لیکن ابھی کوئی حتمی بات نہیں کی جا سکتی، پولیس ملزم کی گرفتاری کے لئے کوششیں کر رہی ہے، ملزم کی گرفتاری کے بعد ہی اصل حقیقت سامنے آئے گی۔
