کراچی (آن لائن) عام لوگ اتحاد کے رہنما جسٹس (ر) وجیہ الدین احمد نے کہا ہے کہ حکمرانوں کو عوام سے زیادہ اپنے پالتو جانوروں کی پرواہ ہے۔ عوام ووٹ کا صحیح استعمال کرکے ایسے لوگوں سے چھٹکارا حاصل کریں۔ انہوں نے ایک بیان میں کہا کہ گزشتہ روز کے اخبارات میں کچھ تصاویر شائع ہوئیں، جن میں ہمارے موجودہ وزیراعظم بنی گالا میں کتوں کو امپورٹڈ غذا مہیا
فرماتے ہوئے نظر آرہے ہیں۔ اس سے پہلے ایک سابق صدر کا کہنا تھا کہ میں اپنے گھوڑوں کو سیب کے مربّے کھلاتا ہوں۔ انہوں نے کہا کہ کہانی وہی پرانی ہے۔ پاکستان کے غریب عوام کو تو دو وقت کی روٹی میسر نہیں۔ ملازمتیں ہیں نہ سر کے اوپر چھتیں ہیں۔ اور حکمرانوں کو اپنے جانوروں کی پڑی ہے۔ لاڑکانہ جو اس وقت سندھ کا غیر رسمی دارالخلافہ ہے وہاں آوارہ کتوں کی بھرمار ہے۔ اور بے نظیر ثانی کا کہنا یہ ہے کہ کتوں کو مارا نہ جائے اور اگر کسی نے غلطی سے ان کتوں کے اوپر ہاتھ کی صفائی دکھائی تو اس پر شدید ردِ عمل سامنے آتا ہے۔ اب یہی آوارہ کتے ہمارے بچوں کیلئے ریبیز جیسی خطرناک بیماری کے حامل ہوتے ہیں، لیکن یہاں تو دراصل کوئی عوامی حکومتیں ہیں ہی نہیں۔ یہاں تو تاریخ میں پڑھی جانے والی صورتحال ہے کہ غلط حکمران جب قابض ہو جاتے ہیں تو طوائف الملوکی کا دور دورہ ہوتا ہے۔ یہاں کوئی کسی کو جوابدہ نہیں ہے۔ اور اگر تو بھگتان کوئی بھگت رہے ہیں تو وہ پاکستانی عوام ہیں۔ انہوں نے کہا کہ یہ سلسلہ اْس وقت تک جاری رہے گا جب تک ہم صحیح لوگوں کو ووٹ دے کر منتخب نہیں کریں گے۔ اْس کی پہچان صرف یہ ہے کہ عوامی نمائندگی کے امیدوار کا ماضی داغدار تو نہیں۔ ہر ووٹر کو یہ دیکھنے کی ضرورت ہے کہ امیدوار کا ماضی کیا ہے، تاکہ اس طرح کے لوگوں کا قلع قمع کیا جائے اور بہتر لوگ پاکستان کی حکمرانی کیلئے منتخب کئے جائیں۔
