اسلام آباد (مانیٹرنگ ڈیسک/این این آئی )ملکی نامور عالم دین مولانا طار ق جمیل کا کرونا ٹیسٹ مثبت آنے کے بعد(سی ایم ایچ )داخل ہو گئے ہیں ۔ ذرائع نے بتایا ہے کہ مولانا طارق جمیل کا ٹیسٹ مثبت آیا تھا وہ سی ایم ایچ ہسپتال میں زیر علاج ہیں۔گزشتہ چند روز سے طبیعت خراب تھی ، کرونا ٹیسٹ کرانے پر رپورٹ مثبت آئی تھی جس کے بعد ڈاکٹروں کے مشورے سے

وہ ہسپتال میں زیرعلاج ہیں۔تاہم ان کی طبیعت ٹھیک ہے ،ہسپتال میں 14 روز تک انہیں قرانطینہ میں رکھا جائے گا ۔ اس حوالے سے مولانا طارق جمیل نے سماجی رابطے کی ویب سائٹ ٹوئٹر پر لوگوں سے صحتیابی کے لیے خصوصی دعاؤں کی درخواست بھی کی ہے۔واضح رہے طارق جمیل ایک معروف پاکستانی مبلغ اور عالمِ دین ہیں، ان کی تبلیغی کوششوں کے باعث بہت سے گلوکار، اداکار اور کھلاڑیوں کی زندگیوں میں واضح تبدیلی دیکھنے میں آئی۔رواں سال حکومت پاکستان کی جانب سے انہیں صدارتی تمغہ حسن کارکردگی سے نوازنے کا اعلان بھی کیا گیا تھا جو 23 مارچ 2021 کو دیا جائیگا۔گزشتہ سال وہ عارضہ قلب کے باعث بھی ہسپتال میں زیرعلاج رہے تھے اور انجیوپلاسٹی کی گئی تھی۔یکم جنوری 2019 کو دل میں درد کی شکایت ہوئی تھی جس کے باعث انہیں ہسپتال منتقل کیا گیا جہاں ان کی انجیوگرافی کی گئی۔بعد ازاں مولانا طارق جمیل کے ترجمان طاہر رحیمی نے بتایا تھا کہ مولانا کو دل کی شریان بند ہونے کی وجہ سے ایک اسٹنٹ ڈالا گیا تھا۔

موضوعات:مولانا طارق جمیل