لاہور (آن لائن) پاکستان مسلم لیگ ن کی میزبانی میں مینار پاکستان پر بروز اتوار ہونے والے پی ڈی ایم کے احتجاجی جلسے کے حوالے سے لاہور کی ضلعی انتظامیہ نے پنڈال کے داخلی راستوں کا تعین کرتے ہوئے دیگر تمام انتظامات مکمل کرلئے ہیں۔ بتایا گیا ہے کہ مینار پاکستان کے گیٹ نمبر 1 کو سیاسی جماعتوں کے ورکروں کی ریلیوں اور عام شہریوں کے لئے مختص کیا گیا ہے۔

گیٹ نمبر 2 اور 3 کو وی وی آئی پیز اور وی آئی پیز کے داخلے کے لئے مختص کیا گیا ہے۔ گیٹ نمبر 4 اور 5 سے پی ڈی ایم میں شامل سیاسی جماعتوں کی خواتین سمیت عام خواتین شہری پنڈال میں داخل ہوسکیں گی۔ یہ بھی بتایا گیا ہے کہ جلسے کی مانیٹرنگ اور فول پروف سکیورٹی فراہم کرنے کے لئے پنڈال میں مجموعی طور پر 150سی سی ٹی وی کیمرے نصب کئے گئے ہیں۔ جن میں سے 44 کیمرے جلسہ گاہ کے سٹیج اور پنڈال کے حوالے سے نصب کئے گئے ہیں جبکہ 56 کیمرے مینار پاکستان کے گرد نواح میں نصب کئے گئے ہیں جلسے میں شرکت کے لئے آنے والوں کی جامع تلاشی کے لئے داخلی راستوں پر 20 واک تھرو گیٹ لگائے گئے ہیں۔ اس طرح جلسے کی براہ راست مانیٹرنگ کے لئے فائبر آپٹیکل بچھائی گئی ہیں۔ جن کے ذریعے پنجاب سیف سٹی اتھارٹی اور سول سیکرٹریٹ میں بنائے گئے کنٹرول روم سے جلسہ گاہ کی براہ راست مانیٹرنگ کی جاسکے گی۔ ضلعی انتظامیہ نے پنڈال کے مانیٹرنگ کے لئے ڈرون کیمروں کی مدد بھی حاصل کرنے کا فیصلہ کیا ہے جبکہ دوسری طرف پاکستان ڈیمو کریٹک موومنٹ میں شامل 11 سیاسی پارٹیوں کے ہزاروں کارکنان جو جمعہ کی رات ہی سے جلسے گاہ پر موجود تھے نے بھی تیاریاں مکمل کرلی ہیں۔ پنڈال میں کرسیاں لگانے لائیٹوں کی تنصیب اور سٹیج کی تیاری کا کام بھی مکمل کرلیا گیا ہے جبکہ جلسہ گاہ کی سکیورٹی کی ذمہ داریاں جمعیت علمائے اسلام (ف) کی ضلعی تنظیم انصار السلام کے کارکنوں نے سنبھال لی ہیں۔ ان تمام تیاریوں سے یہ نتیجہ اخذ کیا جاسکتا ہے کہ جلسے کے انعقاد کے سلسلے میں پنجاب حکومت نے ایک دفعہ پھر یوٹرن لے لیا ہے۔