اسلام آباد (مانیٹرنگ ڈیسک) پیپلز پارٹی کے سینئر رہنما اور ماہر قانون دان اعتزاز احسن نے نجی ٹی وی چینل سے گفتگو کرتے ہوئے کہاکہ کل ہی میں نے بلاول بھٹو کو پیغام بھجوایا تھا کہ احتیاط کریں، جمیل سومرو کو پیغام دیا کہ وہ ان کو کہہ دیں کہ احتیاط کریں

یہ ٹائم نہیں ہے، جلسے میں ایک دوسرے پر چڑھے ہوتے ہیں لوگ ایک دوسرے کے منہ میں سانس لے رہے ہوتے ہیں، پارٹی کے جلسے اناؤنس ہوئے ہیں لیکن احتیاط کرنا ضروری ہے، اعتزاز احسن نے کہا کہ میں نے بلاول کو پیغام بھجوایا کہ آپ کی جان ہمیں عزیز ہے آپ ہمارے پاس بی بی کی نشانی اور امانت ہیں۔ اس موقع پر سینئر صحافی عارف نظامی نے پوچھا کہ کیا ان جلسوں سے واقعی حکومت گر جائے گی، جس پر اعتزاز احسن نے جواب دیا کہ جلسوں سے تو حکومت نہیں گرتی، کسی بازار، دکان، دفتر اور جلسوں میں ایس او پیز پر عمل نہیں ہو رہا، اعتزاز احسن نے کہا کہ یہاں پر حکومتیں بغیر جلسوں کے ہی بدلی جاتی رہی ہیں، بے نظیر بھٹو کی پہلی حکومت 1988 میں بدلی گئی، ایک آئینی طریقہ استعمال کرکے صدر اسحاق نے اسمبلی ختم کر دی، ن لیگ نے سپریم کورٹ پر حملہ کیا، کوئی حکومت نہیں گری کوئی کچھ نہیں ہوا۔ انہوں نے کہا کہ یہ حکومت تب تک جانے والی نہیں جب تک ان کی تحریک میں شر کا عنصر نہ ہو،جس طرح خادم حسین فیض آباد میں دھرنا دے کر بیٹھے تھے۔