اسلام آباد (این این آئی)ڈپٹی چیئرمین سینیٹ سلیم مانڈوی والا نے ملکی معیشت پر تشویش کا اظہار کردیا۔ اپنے بیان میں انہوں نے کہاکہ ملکی معیشت کی صورتحال انتہائی تشویشناک ہے، ملک میں تاجر بے یقینی کی صورتحال کا شکار ہیں۔

انہوں نے کہاکہ تاجروں کے تحفظات اور خدشات درست اور انتہائی تشویشناک ہیں، حکومت معیشت کو درست سمت میں لانے سے متعلق اٹھائے گئے اقدامات سے پارلیمان کو آگاہ کرے۔ انہوں نے کہاکہ ورلڈ بینک کی جائزہ رپورٹ کے مطابق رواں سال معیشت میں صرف صفرعشاریہ پانچ فیصد اضافہ ہوا ہے، ورلڈ بینک کے مطابق اگلے 2 برس میں معیشت میں صرف ایک سے ڈیڑھ فیصد اضافہ متوقع ہے، ملکی معیشت کی بحالی کے لیے سپورٹ کی اشد ضرورت ہے۔ انہوں نے کہا کہ غذائی افراط زر 5 فیصد اور بنیادی افراط زر 6 فیصد ہے، ڈسکاونٹ ریٹ کی شرح میں بھی کمی کی ضرورت ہے۔ ڈپٹی چیئرمین سینیٹ نے کہا کہ معیشت کو بروقت سنبھالنے کے لئے اقدامات نہ کئے گئے تو معاملات ہاتھوں سے نکل جائیں گے۔