لاہور( این این آئی)صوبائی وزیر فیاض الحسن چوہان نے کہا ہے کہ ہمارے آبا ئو اجداد اپنی جاگیریں، عزتیں، وجاہتیں، باغات سمیت اپنا سب کچھ ہندوستان چھوڑ کر پاکستان اس لئے آئے تاکہ وہ دو قومی نظریے کے مطابق عزت و احترام سے اپنی زندگی گزار سکیں،ایک طرف پاکستان میں اقلیتوں کے لیے کرتار پور راہداری بنائی گئی، مندروں کے لیے خصوصی فنڈز جاری کیے جا رہے ہیں اور تمام سیاسی جماعتیں،انتظامیہ، عوام، پولیس اور فوج اقلیتوں کی عزت و ناموس کی حفاظت میں مصروف ہیں دوسری جانب انتہا پسند مودی کی انتہا پسند جماعت بی جے پی اور آر

ایس ایس کے انڈیا میں بابری مسجد شہید کر کے رام مندر تعمیر کیا جاتا ہے، آج بھارت میں اقلیتوں سمیت چھوٹی ذات کے ہندوں کی بھی عزت محفوظ نہیں۔ ان خیالات کا اظہار صوبائی وزیر اطلاعات فیاض الحسن چوہان نے چودہ اگست کے موقع پر چائلڈ پروٹیکشن اینڈ ویلفیئر بیورو کے بچوں کے ہمراہ یومِ آزادی منانے کی تقریب سے خطاب کرتے ہوئے کیا۔ انہوں نے بھارت کو خبردار کرتے ہوئے کہا کہ فرانس سے حال ہی میں ملنے والے رافیل طیارے پاکستان بھیجنے کی غلطی نہ کرے ورنہ 27 فروری 2019 کی طرز پر ’’طیارے زمیں پر، پارٹ ٹو‘‘ بنا دی جائے گی۔ انہوں نے کہا کہ اپنی افرادی قوت اور زیادہ دفاعی بجٹ پر ناز کرنے سے پہلے بھارت یہ جان لے کہ جنگیں جذبہ حب الوطنی اور جذبہ ایمانی سے جیتی جاتی ہیں۔انہوں نے کہا کہ پاکستان کا تہترواں یومِ آزادی قائد اعظم محمد علی جناح کی دیانتدار اور دوراندیش قیادت، مفکرِ پاکستان علامہ محمد اقبال کی انقلابی سوچ، 1930 میں ’’ نوو اورنیور‘‘کا کتابچہ لکھ کر جوانی میں پاکستان کا نام تجویز کرنے والے چوہدری رحمت علی، اپنی عزت و عصمت بچانے کے لیے خود کو بیاس کی لہروں کے سپرد کرنے والے ایک نوجوان لڑکی، اور پاکستان سے محبت کرنے پر اپنا بچہ قربان کرنے والی ایک بیوہ خاتون کے نام ہے۔