لاہور (آن لائن) پاکستان مسلم لیگ (ن) کے رہنما اور سابق وفاقی وزیر ریلوے خواجہ سعد رفیق نے کہا ہے کہ پاکستان میں ریاست اور حکومتی مفادات متصادم ہیں۔ جھوٹا احتساب سیاسی انتقام اور معیشت اکٹھے نہیں چل سکتے۔ اگر حکومت نے اپنی روش تبدیل نہ کی تو پاکستان کو ناقابل تلافی نقصان ہوگا۔ احتساب عدالت کے باہر میڈیا سے گفتگو کرتے ہوئے خواجہ سعد رفیق نے کہا کہ ملک میں ہر بحران موجودہ حکومت پیدا کرتی ہے۔ بحران ختم کرنے کے لئے معاملہ این ڈی ایم اے کے حوالے کردیتی ہے۔ انہوں نے کہا کہ یہ حکومت فیل ہوچکی
ہے۔ پاکستان کے عوام حکومتکو بد دعائیں دے رہے ہیں۔ ہم عدلیہ کی عزت کرتے ہیں۔ یہی وجہ ہے کہ ہم وکلاء کی جان خطرے میں ڈال کر عدالتوں میں پیشی ہو رہے ہیں۔ اس موقع پر سابق صوبائی وزیر صحت پنجاب خواجہ سلمان رفیق نے میڈیا سے گفتگو کرتے ہوئے کہا کہ موجودہ حکومت کی نا اہلی کی وجہ سے پنجاب بھر میں کرونا پھیل چکا ہے۔ اگر حکومت کرونا کے خلاف جنگ میں فرنٹ لائن پر کام کرنیوالے ڈاکٹروں کو سہولتیں نہیں دے گی تو ڈاکٹر استعفے ہی دیں گے۔ اس وقت صوبے بھر میں کرونا وائرس عروج پر ہے جبکہ حکومت ٹیکس کی وصولی ہیں ناکام ہوچکی ہے۔