اسلام آباد (این این آئی) پاکستان مسلم لیگ (ن)کے سیکرٹری جنرل احسن اقبال نے کہا ہے کہ نارووال سپورٹس سٹی کمپلیکس بنانا جرم اور چینی کا تین سو ارب کا غبن درست ہے ،چینی کا غبن کر نے والے لندن میں بیٹھے ہوئے ہیں ،چینی چوروں کو بچانے کیلئے آپ نے پوری شوگر انڈسٹری کو چور بنادیا ،عمران خان کا تعلق ریاست مدینہ سے نہیں سویت یونین سے ہے ،عمران خان کو بی آرٹی ،

چینی اور دوائیوں کی کرپشن کا حساب دینا ہوگا ،نوازشریف کی صحت بہتر ہورہی ہے ،جوں ہی کورونا ختم ہو گا تو نواز شریف کا ہارٹ پروسیجر ہو گا،جب نیب کے پاس گواہ نہیں ہے تو مجھے دو ماہ سے زائد جیل میں کیوں رکھا؟۔ احتساب عدالت کے باہر میڈیا سے گفتگو کرتے ہوئے احسن اقبال نے کہاکہ میں کووڈ سے ابھی ریکوور ہوا ہوں پھر بھی عدالت میں پیش ہوا ہے،نیب ابھی تک ریفرنس مکمل نہیں کر سکا۔ انہوںنے کہاکہ جب نیب کے پاس گواہ نہیں ہے تو مجھے دو ماہ سے زائد جیل میں کیوں رکھا؟نیب انتقامی کارروائی کرتا ہے اور حکومت کے ایجنڈے کی تکمیل کرتا ہے۔ انہوںنے کہاکہ نارووال سپورٹس سٹی کمپلیکس بنانا جرم ہے لیکن چینی کا تین سو ارب کا غبن درست ہے،چینی کا غبن کرنے والے لندن میں بیٹھے ہوئے ہیں،چینی کی قیمت 53 روپے سے 90 روپے تک کس کی وجہ سے گئی کس نے ساز باز کی تھی،کس نے عوام کی جیب پر ڈاکہ ڈالا تھا،انہوں نے چینی چوروں کو بچانے کیلئے پوری شوگر انڈسٹری کو چور بنا دیا۔ انہوںنے کہاکہ ایک جہاز کریش ہوا، اس کی رپورٹ میں اپنی نااہلی چھپانے کیلئے پوری ایوی ایشن کو داؤ پر لگا دیا،یہ اپنے آپ کو ریفارمر ثابت کرنے کیلئے پورے ملک کو ڈاکو بنا رہے ہیں،عمران خان پاکستان کا گوربہ چوف ہے،عمران خان کا تعلق ریاست مدینہ سے نہیں بلکہ سوویت یونین سے ہے،کیا حکومت اور کابینہ کے چہرے ریاست مدینہ کا میرٹ ہیں؟اس حکومت کا ریاست مدینہ سے اتنا ہی تعلق ہے جتنا وسکی کی بوتل کا اسلام سے ہو سکتا ہے۔ انہوںنے کہاکہ اب ایف آئی اے کی ٹیمیں ہمارے پیچھے لگائی ہوئی ہیں،ایف آئی اے اب نیب ٹو بنا ہوا ہے،اس حکومت کے اب جانے کا وقت آ چکا ہے۔ انہوںنے کہاکہ نواز شریف کی صحت اب بہتر ہو رہی ہے،نواز شریف کو ہارٹ پروسیجر کی ضرورت ہے جو کورونا کی وجہ سے رکا ہوا ہے ،جوں ہی کورونا ختم ہو گا تو نواز شریف کا ہارٹ پروسیجر ہو گا۔ انہوںنے کہاکہ ہمیں وہ پاکستان ملا تھا جس میں اتھارہ گھنٹے لوڈشیڈنگ تھی ہم نے ختم کی،جب ہمیں پاکستان ملا تو دہشتگردی ہو رہی تھی ہم نے ختم کی۔ انہوںنے کہاکہ ہم نے جب پاکستان دیا تو گندم درآمد کرنے کی ضرورت نہیں تھی۔ انہوںنے کہاکہ عمران خان سے بی آر ٹی کی کرپشن کا حساب لیا جائے گا،عمران خان کو چینی کی کرپشن کا حساب دینا ہو گا،عمران خان سے دوائیوں میں کرپشن کا حساب لیا جائے گا،عمران خان کو اپنے تمام اعمال کا حساب دینا ہو گا اب آپ کے حساب کا وقت ہے۔