بہاولنگر(این این آئی) پاکستان مسلم لیگ زیڈ کے سربراہ چوہدری اعجاز الحق کا اختر مینگل کی پریس کانفرنس پر رد عمل دیتے ہوئے کہا کہ اختر مینگل اپنے پہلو میں بیٹھے مولانا فضل الرحمن کی خوشنودی اور ان کی تفنن طبع کیلئے بے بنیاد الزام تراشی کررہے ہیں۔
اختر مینگل نے جنرل ضیاء الحق شہید کی جائیداد کی بات کی ہے۔مجھے فخر ہے کہ جنرل ضیاء الحق کے تمام سیاسی مخالف ان پر کسی بدعنوانی کا الزام نہیں لگا سکتے۔ بلوچستان میں جہاں بھٹو اور مشرف نے عسکری کاروائیاں کیں جنرل ضیاء الحق نے اقتدار سنبھالتے ہی تمام آپریشن کو روک دیا۔حیدر آباد ٹریبونل توڑ کر عطاء اللہ مینگل سمیت تمام بلوچ رہنماؤں اور سرداروں کو رہا کیا۔اعجاز الحق نے کہا کہ ان کے والد عطاء اللہ مینگل کی صحت انتہائی خراب تھی توجنرل ضیاء الحق نے جب انہیں بیرون ملک علاج کی سہولت بہم پہنچائی۔ جنرل ضیاء الحق بلوچستان میں امن و امان کیلئے اقدامات کررہے تھے تو بلوچستان کے کچھ سردار اپنی ہی ریشہ دوانیوں کو آگے بڑھا رہے تھے۔ جنرل ضیاء الحق نے کوئٹہ کو سوئی گیس فراہم کرنے کا حکم دیا تو متعلقہ حکام نے اپنی جمع تفریق لگا کر اس منصوبے کی شدید مخالفت کی۔ اسے ناقابل عمل قرار دیا تو ضیاء الحق نے کہا کہ یہ کوئی اقتصادی منصوبہ نہیں بلکہ سیاسی فیصلہ ہے۔ ضیاء الحق شہید کو جائیداد بنانے کا طعنہ دنے والے سن لیں کہ صدر کیلئے مختص مراعات اور سہولیات میں سے انہیں یا ہمیں تو کچھ بھی نہیں ملا۔شہید ضیاالحق کی فوجی خدمات کے مطابق صرف پنشن ہی ملی ہے۔
انتہائی مشکل حالات میں بھی ضیا شہید نے وطن عزیز کے مفادات کو مقدم رکھا۔میں اپنے پورے خاندان کو احتساب کیلئے پیش کرتا ہوں وہ بھی ذرا ہمت کریں اور خود کو احتساب کیلئے پیش کریں۔حکومت اعلیٰ سطحی مشترکہ تحقیقاتی ٹیم (JIT) تشکیل دے جو اختر مینگل اور ہمارے اثاثو ں کی تحقیقات کرے جنرل ضیاء الحق شہید کی جائیداد کیساتھ اختر مینگل اپنے اثاثوں کا تبادلہ کرلیں۔
