لاہور (آن لائن) معروف ایٹمی سائنسدان محسن پاکستان ڈاکٹر عبدالقدیر خان نے کہاہے کہ 28 مئی پاکستانی تاریخ کا ناقابل فراموش دن ہے، اس دن ملک کا دفاع ناقابل تسخیر بنا دیا۔پاکستان ایک ایٹمی قوت کے طور پر دنیا کے سامنے آیا۔ 28مئی کو پوری دنیا نے نعرہ تکبیر، اللہ اکبر کا نعرہ سنا۔ یوم تکبیر قوم کی بہادری کی علامت کادن ہے، اس دن ملک کا دفاع ناقابل تسخیر بنا دیا۔پاکستان کے خلاف جارحیت کا مظاہرہ کرنے والوں کا انجام عبرتناک ہوگا، 28 مئی پاکستانیوں کے لئے اللہ تعالی کے حضور سجدہ شکر بجالانے کا دن ہے۔ ڈاکٹر اے کیو
خان ہسپتال ٹرسٹ میں یوم تکبیر کے موقع پر کیک کاٹنے کی تقریب کا اہتمام کیا گیا۔تقریب کی صدارت چیف ایگزیکٹو آفیسر شوکت ورک نے کی۔تقریب میں یوم تکبیر کے حوالے سے کیک کاٹا گیا۔ ڈاکٹر عبدالقدیر خان نے کہا کہ پاکستان کی طرف کوئی بھی میلی آنکھ سے دیکھنے کی جرات نہیں کر سکتا۔ 28مئی کو دشمن کے مقابلے میں پاکستان نے ایٹمی دھماکے کرکے نا صرف پاکستانی قوم بلکہ پوری مسلمہ امہ کا سر فخر سے بلند کر دیا۔ڈاکٹر عبدالقدیر خان نے کہا کہ ایٹم بم بنانے کا تمام کام کہوٹہ ریسرچ لیبارٹری میں ہوا۔ جہاں میں نے اپنی ٹیم کے ساتھ ملکر ایٹم بم بنایا۔ ملک کا دفاع ناقابل تسخیر بنانے کے بعد اب سماجی اور فلاحی کاموں میں بڑھ چڑھ کر حصہ لے رہا ہوں۔ اپنی تمام زندگی رفاعی کاموں کے لئے وقف کر دی ہے۔اس وقت میرا مشن صحت اور تعلیم کا شعبہ ہے۔ اس وقت لاہور میں ڈاکٹر اے کیو خان ہسپتال بڑا منصوبہ ہے۔ جہاں پر غریبوں کا مفت علاج معالجہ جاری ہے۔ اس کے 400بستروں پر مین ٹاور کی تعمیر کا کام بھی اخری مراحل میں ہے۔اس کے علاوہ ہسپتال میں ڈائیلسز سنٹر میں بھی مریضوں کے مفت ڈائیلسز کرنے کے ساتھ ساتھ ادویات بھی فراہم کی جا رہی ہے۔ تقریب سے خطاب کرتے ہوئے شوکت ورک نے کہا کہ ڈاکٹر عبدالقدیر خان کی قیادت میں عوامی خدمت کا مشن جاری ہے۔دکھی انسانیت کے لئے بھرپور کام کر رہے ہیں۔ جس طرح ڈاکٹر عبدالقدیر خان نے ملک کے دفاع کو ناقابل تسخیر بنا دیا ہے، اسی طرح صحت کے شعبہ میں بھی انقلابی اقدامات اٹھا رہے ہیں۔ پاکستانی عوام ڈاکٹر عبدالقدیر خان کے صحت مشن میں ہمارا ساتھ دیں اور ہسپتال کی تعمیر میں مدد کریں۔