اسلام آباد(آن لائن)وفاقی وزیر مملکت برائے ماحولیاتی تبدیلی زرتاج گل نے کہا ہے کہ تحریک انصاف حکومت نے بڑے مگر مچھوں پر ہاتھ ڈالا، ملک سے کرپشن کے خاتمے کے نعرے پر قائم ہیں۔ وزیراعظم عمران خان کسی دباؤ سے پریشان نہیں ہوتے، کرپشن کا خاتمہ کریں گے۔ ہفتے کے روز نجی ٹی وی سے گفتگو کرتے ہوئے زرتاج گل نے کہا ہے کہ عوام کو تحریک انصاف اور عمران خان پر اعتماد تھا اس لئے ووٹ ملے ہیں۔ زرتاج گل نے کہا کہ تحریک انصاف کی
حکومت نے بڑے بڑے مگر مچھوں پر ہاتھ ڈالا ہے ہم کرپشن کے نعرے پر قائم ہیں اور ملک سے کرپشن کا خاتمہ کریں گے۔ وزیر مملکت برائے ماحولیاتی تبدیلی زرتاج گل نے کہا کہ ہماری حکومت کے خلاف دھرنا دینے کیلئے مدارس کے طلبہ کو لایا گیا لیکن وزیراعظم عمران خان کسی دباؤ سے پریشان نہیں ہوتے انہوں نے کہا کہ 31ہزار ارب کا قرضہ ہم نے نہیں لیا بلکہ ماضی کی حکومتوں نے لیا جس کے باعث ملک مشکل حالات سے گزر رہا ہے۔
