اسلام آباد(مانیٹرنگ ڈیسک)فیصل آباد کے علاقے قدرت آباد میں 2 ڈاکوئوں نے ایک عرضی نویس سے 15 کلو آٹے کا تھیلا چھین لیا اور باآسانی فرار ہوگئے ، نجی ٹی وی کے مطابق عرضی نویس عمران حیدر نے تھانہ غلام محمد آباد میں آٹے کا تھیلا چھینے جانے کےخلاف باقاعدہ درخواست بھی دے دی ۔ درخواست گزار نے اپنی درخواست میں موقف اختیار کیا وہ دکان سے 15 کلو گرام آٹے کا تھیلا خرید کر اپنی موٹرسائیکل پررکھ کر گھر

جارہا تھا کہ اچانک ایک موٹرسائیکل پرسواردو ملزمان نے اسے روکا، تھپڑ مارے اور تشدد کا نشانہ بنانے کے بعد آٹے کا تھیلا چھین کر فرار ہوگئے ۔درخواست گزار عمران حیدر نے اپنی درخواست میں کہا ہے کہ اسے لوٹا گیا آٹے کا تھیلا واپس دلایا جائے اور ملزمان کو قرار واقعی سزا دی جائے۔علاقہ پولیس نے درخواست گزار سے عرضی وصول کرلی ہے اور یقین دہانی کرائی ہے کہ اسے انصاف دلانے کی بھرپور کوشش کی جائیگی۔

موضوعات:آٹا