کراچی(این این آئی)کراچی سے لاہور کا فضائی سفر مہنگا ہوگیا،دونوں شہروں کے درمیان جہاز کا یک طرفہ کرایہ 35 ہزار روپے تک پہنچ گیا ہے۔پی آئی اے،سرین ایئر اور ایئر بلیو کی اندرون ملک پروازوں کے کرایوں میں اضافہ ہوا ہے۔ ایئرلائن حکام کے مطابق اندرون ملک روٹس پر فضائی ٹریفک
زیادہ ہونے اور مسافروں کی تعداد بڑھنے کے باعث یک طرفہ کرایوں میں 10 ہزار سے 15 ہزار تک اضافہ ہوا ہے۔ ٹریول ایجنٹس ایسوسی ایشن کے چیئرمین ندیم شریف نے اس ضمن میں بتایا کہ شاہین ایئرلائن کے بند ہونے کے بعد، دو برس سے اندرون ملک پروازوں کے کرایوں میں اضافہ کیا جارہا ہے۔شاہین ایئرلائن کی جانب سے کراچی سے لاہور اور لاہور سے کراچی کی 3 پروازیں روزانہ آپریٹ ہوتی تھیں۔ اس کے علاوہ کراچی سے اسلام آباد کے روٹ پر بھی 3 ریٹرن پروازیں اڑا کرتی تھیں۔ شاہین ایئرلائن بند ہونے سے دیگر ایئرلائنز پر مسافروں کا شدید دباؤ پڑا ہے۔انہوں نے بتایا کہ کرایوں میں اضافے کی وجہ ایندھن کی بڑھتی ہوئی قیمتوں کو قرار دیا گیا ہے۔انہوں نے بتایا کہ کراچی سے لاہور پرواز کا یک طرفہ کرایہ اب 35 ہزار روپے ہے۔ یعنی اگر آپ دوبارہ جہاز سے کراچی آنا چاہتے ہیں تو کرایہ 70 ہزار روپے بنتا ہے۔یہ صرف کراچی کے روٹ کے ساتھ نہیں ہوا ہے۔ لاہور سے پشاور،کوئٹہ،اسلام آباد،رحیم یار خان اور فیصل آباد کے درمیان پروازوں کے یک طرفہ کرایوں میں 10 ہزار سے 15 ہزار اضافہ ہوا ہے۔دو سال پہلے، کراچی سے لاہور یا لاہور سے کراچی کا یک طرفہ ٹکٹ 10 ہزار سے 11 ہزار کے درمیان تھا۔اس صورتحال میں لوگوں سفر کے لیے ٹرین کو ترجیح دے رہے ہیں۔ تاہم ٹرین کے ٹکٹ کے لیے 15 روز قبل آن لائن سسٹم کے ذریعے بکنگ کروانی پڑتی ہے۔
