اسلام آباد (مانیٹرنگ ڈیسک)پنجاب انسٹیٹیوٹ آف کارڈیالوجی میں ہنگامہ آرائی کرنے والے وکلا ء میں شامل وزیراعظم عمران خان کے بھانجے حسان نیازی پولیس چھاپے سے قبل گھر سے فرار ہو گئے ،پولیس افسران نے گرفتاری کیلئے ٹیمیں تشکیل دے دیں۔تفصیلات کے مطابق پی آئی سی میں
توڑ پھوڑ اورساتھی وکلاء کو اشتعال دلانے کی ویڈیو سامنے آنے پر پولیس نے وزیر اعظم کے بھانجے حسان نیازی کی گرفتاری کے لئے ان کی رہائشگاہ پر چھاپہ مارا تاہم وہ پہلے ہی فرار ہو گئے ۔پولیس افسران کے مطابق ان کی گرفتاری کے لیے ٹیمیں تشکیل دیدی گئی ہیں۔ڈی آئی جی انویسٹی گیشن کا کہنا ہے کہ حسان نیازی کو جلد گرفتار کر لیا جائے گا، گرفتاریوں کے حوالے سے ہم پر کوئی دبا ئونہیں، جس نے بھی قانون شکنی کی اسے گرفتار کیا جائے گا۔ جبکہ وفاقی وزیر فواد چوہدری کا کہنا تھا کہ حسن نیازی وزیر اعظم عمران خان کے بھانجے کے علاوہ وزیر اعظم کے ناقد حفیظ نیازی کا بیٹا بھی ہے۔وفاقی وزیر نے آئی جی پنجاب کے دفتر کی حفاظت پر رینجرز کی تعیناتی کا جواب دیتے ہوئے کہا کہ بیچارا آئی جی اپنی جان چھڑا رہا ہو گا۔ انہوں نے فیاض چوہان اور معاون خصوصی فردوس عاشق اعوان کے ن لیگ پر لگائے گئے الزامات کی تردید کرتے ہوئے کہا کہ ایسا کچھ نہیں ہے یہ وکلا ہی تھے کسی سیاسی جماعت سے تعلق نہیں تھا ان کی اپنی بار کی سیاست ہے۔
