پشاور (این این آئی) شاہ پور چوکی کے قریب گاڑی پر فائرنگ سے ڈپٹی سپرنٹنڈنٹ پولیس رورل شہید ہو گئے۔ایس ایس پی آپریشنز ظہور آفریدی نے بتایا کہ شاہ پور چوکی کے قریب فائرنگ سے قائم مقام ڈی ایس پی رورل سی ٹی ڈی غنی خان شہید ہو گئے۔ظہور آفریدی نے بتایا کہ فائرنگ کے نتیجے میں ڈی ایس پی کے گن مین اور ڈرائیور زخمی بھی ہوئے۔وزیراعلیٰ خیبرپختونخوا محمود خان نے پولیس چوکی پر فائرنگ کے واقعے کا نوٹس لیتے ہوئے
آئی جی پولیس کو رپورٹ پیش کرنے کی ہدایت کی ہے۔ وزیراعلیٰ محمود خان نے زخمی اہلکاروں کو بہترین طبی سہولیات فراہم کرنے کی ہدایت بھی کی ہے۔ڈائریکٹر لیڈی ریڈنگ ہسپتال ڈاکٹر خالد مسعود کا کہنا ہے کہ ڈی ایس پی رورل سی ٹی ڈی کی میت ہسپتال لائی گئی، پشاور واقعے کے 3 زخمیوں کو بھی ہسپتال پہنچا دیا گیا۔ڈاکٹر خالد مسعود نے کہا کہ زخمیوں کو طبی امداد فراہم کی جا رہی ہے، زخمیوں کو بہترین علاج کے لیے ہدایات جاری کر دی ہیں۔
