لاہور(این این آئی)پاکستان پیپلز پارٹی کے چیئرمین بلاول بھٹو زرداری نے کہا ہے کہ پہلے وزیراعظم سلیکٹڈ تھا اب چیئرمین سینیٹ بھی سلیکٹڈ ہے،سب نے دیکھا 64 لوگ کھڑے تھے لیکن ڈبے سے 50ووٹ نکلے،دنیا نے سرعام سینیٹ میں چوری ہوتے دیکھی،عوام کے معاشی حقوق کی جنگ لڑ کر ہی کٹھ پتلیوں کو شکست دی جا سکتی ہے۔ ان خیالات کا اظہار انہوں نے بلاول ہاؤس لاہو رمیں  پنجاب ایگزیکٹو کے اجلاس سے خطاب کرتے ہوئے کیا۔

اس موقع پر قمر زمان کائرہ، چوہدری منظوری، ثمینہ خالد گھرکی،چوہدری اسلم گل،سید حسن مرتضیٰ،حاجی عزیزالرحمن چن اور دیگر رہنما شریک ہوئے۔اجلاس میں ملک کی مجموعی صورتحال اور پارٹی کے تنظیمی امور پر تبادلہ خیال کیا گیا جبکہ پنجاب میں عوامی رابطہ مہم کے حوالے سے بھی گفتگو کی گئی۔بلاول بھٹو زرداری نے براہ راست پارٹی عہدیداروں سے تجاویز بھی لیں۔ بلاول بھٹو نے خطاب کرتے ہوئے کہا کہ پیپلزپارٹی پنجاب کے عہدیدار مقامی سطح کے مسائل کیلئے آواز اٹھائیں،ہم نے ہمیشہ عوام کے معاشی حقوق کا تحفظ کیا،عوام کے انسانی، جمہوری اور معاشی حقوق کیلئے جدوجہد جاری رہے گی۔ انہوں  نے کہا کہ سلیکٹڈ کٹھ پتلی حکومت نہیں جانتی کہ بجلی اور پٹرول مہنگا ہونے سے عوام پر کیا گزرتی ہے،صدر زرداری نے مہنگائی کے مقابلے کیلئے تنخواہوں اور پنشن میں 170فیصد اضافہ کیا، فوجی جوانوں کی تنخواہوں میں 200 فیصد اضافہ کیا گیا۔پنجاب کے جیالے پی ٹی آئی کی صوبائی حکومت کے ظالمانہ اقدامات کو بے نقاب کریں، اگر پنجاب میں ناجائز تجاوزات کے نام پر گھر گرائے جائیں تو جیالے اس مسئلے کو اٹھائیں، پنجاب کے کسانوں کے ساتھ درپیش مسائل کو اجاگر کیا جائے۔ انہوں نے کہا کہ اسلام ہمارا دین ہے تاہم پاکستان پیپلزپارٹی سیاست میں مذہبی کارڈ استعمال نہیں کرے گی۔عوام کے معاشی حقوق کی جنگ لڑ کر ہی کٹھ پتلیوں کو شکست دی جا سکتی ہے۔ انہوں نے کہا کہ پہلے وزیراعظم سلیکٹڈ تھا اب چیئرمین سینیٹ بھی سلیکٹڈ ہے،سب نے دیکھا 64 لوگ کھڑے تھے لیکن ڈبے سے 50ووٹ نکلے،دنیا نے سرعام سینٹ میں چوری ہوتے دیکھی۔ترجمان کے مطابق پیپلز پارٹی کے چیئرمین بلاول بھٹو زرداری آج (ہفتہ) دوپہر ایک بجے بلاول ہاؤس لاہور میں پریس کانفرنس کریں گے۔