پشاور(این این آئی)عوامی نیشنل پارٹی کے مرکزی سینئر رہنما‘ سینیٹ آف پاکستان میں عوامی نیشنل پارٹی کے سابق پارلیمانی لیڈراور یونائیٹڈ بزنس گروپ کے لیڈر سینیٹر الیاس احمد بلور نے چیئرمین سینیٹ صادق سنجرانی کو عہدے سے ہٹانے کی قرار داد پر رائے شماری کے موقع پر

سینیٹرز کی ہارس ٹریڈنگ پر تشویش کا اظہار کرتے ہوئے کہا ہے کہ14 سینیٹرزنے اپنے ضمیر کا سودا کرکے عدم اعتماد کی تحریک کو ناکام بنایا جس سے نہ صرف سینیٹ کا وقار مجروح ہوا ہے بلکہ پاکستان کے ایوان بالا کی بے عزتی ہوئی ہے جس کی تاریخ میں مثال نہیں ملتی۔ انہوں نے کہاکہ ان 14 سینیٹرز نے پیسے لیکر اپنے ضمیر کا سودا کیا ہے جو کہ انتہائی شرمناک اور افسوسناک عمل ہے۔ یونائیٹڈ بزنس گروپ کے لیڈر اور ملک کے ممتاز صنعتکار سینیٹر الیاس احمد بلور نے چیئرمین سینیٹ کے خلاف تحریک اعتماد کی ناکامی پر ردعمل دیتے ہوئے کہا ہے کہ جادو تو چلا ہے لیکن ضمیر فروشی ہوئی ہے۔انہوں نے کہاکہ پاکستان کی تاریخ میں سینیٹ کی اتنی بے عزتی نہیں ہوئی جتنی کہ اس عدم اعتماد کی تحریک کے ذریعے کی گئی۔انہوں نے کہاکہ 14 سینیٹروں نے اپنے ووٹوں کا سودا کرکے پاکستان کے سب سے معتبر قانون ساز ادارے کی بے عزتی کی ہے۔ انہوں نے کہا کہ ڈرا دھماکہ کر چند ووٹ توڑنے کا کھیل قابل فخر نہیں بلکہ شرمناک فعل ہے۔ انہوں نے کہاکہ چیئرمین سینیٹ کے الیکشن میں 65 ووٹ والے ہار گئے جبکہ 36 والے جیت گئے۔ انہوں نے کہاکہ اپوزیشن کے 64 سینیٹرز نے قرارداد کے حق میں ہاتھ اٹھایا لیکن ووٹ صرف 50 سینیٹرز نے ہی کاسٹ کیاجس سے صاف واضح ہوتا ہے کہ اپنوں نے ہی دھوکہ دیا ہے۔ انہوں نے اس بات پر زور دیا کہ ضمیر فروش سینیٹرز کے خلاف تحقیقات ہونی چاہئے۔