لاہور31 جولائی(نیوزڈیسک) وزیراعلیٰ پنجاب سردار عثمان بزدار کی زیر صدارت آج سول سیکرٹریٹ میں جنوبی پنجاب کے ترقیاتی منصوبوں کا جائزہ لینے کیلئے اجلاس منعقد ہوا۔وزیراعلیٰ عثمان بزدار نے سڑکوں کے بعض منصوبوں میں تاخیر اور
غیر معیاری مٹیریل کے استعمال پرسخت برہمی کا اظہار کیااور ترقیاتی منصوبوں کو مقررہ مدت میں مکمل نہ کرنے پر متعلقہ حکام کی سرزنش کی۔ وزیراعلیٰ نے کہا کہ سرکاری افسران ترقیاتی منصوبوں کی تکمیل کے دوران کڑی مانیٹرنگ کریں،معیار اورشفافیت کو یقینی بنایا جائے۔فلاح عامہ کے منصوبوں میں کوالٹی پر کوئی سمجھوتہ نہیں ہوگا۔ڈی جی خان سمیت جنوبی پنجاب کے ڈویلپمنٹ پراجیکٹس مقررہ مدت میں مکمل کیے جائیں۔انہوں نے کہا کہ محکمے کیا کررہے ہیں،عوام کے مسائل حل کرنے پر فوری توجہ دی جائے۔ وسائل کا رخ پسماندہ علاقوں کی طرف کردیا ہے،کوئی رکاوٹ قابل برداشت نہیں۔صفائی کے مسائل کے حل کیلئے ضروری مشینری کی بروقت فراہمی یقینی بنائی جائے۔اجلاس میں ماڈل کیٹل مارکٹیوں کے منصوبوں پر ہونے والی پیش رفت کا جائزہ لیا گیا۔مختلف محکموں کی طرف سے ترقیاتی منصوبوں سے متعلق تفصیلی بریفنگ دی گئی۔چیئرمین منصوبہ بندی و ترقیات،پرنسپل سیکرٹری وزیراعلیٰ، سیکرٹری انڈسٹریز،سیکرٹری خزانہ اور متعلقہ حکام نے اجلاس میں شرکت کی۔
