لاہور(این این آئی)سابق وزیر خزانہ اسحاق ڈار کیخلاف آمدن سے زائد اثاثہ جات کیس میں اہم پیشرفت ہوئی ہے، نیب لاہور نے اسحاق ڈار کیخلاف منی لانڈرنگ میں ملوث ہونے کے شواہد حاصل کر لئے۔ نیب کے مطابق اسحاق ڈار کیخلاف منی لانڈرنگ کی باقاعدہ تحقیقات کا آغاز کر دیا گیا۔سابق وزیر خزانہ ملزم اسحاق ڈار کے مختلف بینک اکاؤنٹس سے ضبط شدہ 50 کروڑ روپے کی رقم صوبائی حکومت کو منتقل کر دی گئی ہے۔نیب نے عدالتی حکم پر عملدرآمد کرتے ہوئے 50 کروڑ کی خطیر رقم بینک الفلاح، حبیب بینک لمیٹڈ

اور الائیڈ بینک لمیٹڈ کے اکاؤنٹس سے ضبط کیں جو قومی خزانے میں جمع کروا دی گئی۔ چند روز قبل نیب لاہور کی جانب سے اسحاق ڈار کا گلبرگ میں واقع 5 کنال رقبہ پر محیط بنگلہ بھی بحق سرکار ضبط کر لیا گیا۔نیب لاہور کی جانب سے حکومت پنجاب کو پابند کیا گیا ہے کہ مذکورہ بنگلہ کو فروخت کرکے حاصل ہونیوالی رقم قومی خزانے میں جمع کروائی جائے۔بنگلہ کی موجودہ مالیت کا تخمینہ 12 سے 15 کروڑ لگایا جاتا ہے۔اسحاق ڈار کے خلاف جاری کیس میں عنقریب چند مزید اہم پیشرفت ہونیکی توقع بھی کی جا رہی ہیں۔