راولپنڈی (آن لائن) وفاقی پولیس نے کرایہ داری ایکٹ کی خلاف ورزی پر گرفتارسابق وزیر اعظم کے مشیر معروف صحافی و کالم نگار عرفان صدیقی کو راولپنڈی کی سینٹرل جیل اڈیالہ منتقل کر دیا ہے انہیں ہفتہ کی سہ پہر اڈیالہ جیل منتقل کیا گیا عرفان صدیقی کے خلاف تھانہ رمنا پولیس نے 26جولائی کوتعزیرات پاکستان کی دفعہ188کے تحت مقدمہ نمبر243درج کیا تھا
ایف آئی آر کے متن کے مطابق رمنا پولیس نے مکان نمبر168گلی نمبر53 سیکٹرG-10/3 اسلام آباد میں ایک گھر کو چیک جہاں پر جاوید اقبال خٹک سکنہ مستی خیل ضلع کرک رہائش پذیر تھا پڑتال پر معلوم ہوا کہ وہ یہاں کرایہ دار ہے اور یہ مکان عرفان الحق صدیقی سکنہ مکان نمبر82گلی نمبر3سیکٹرG-10/3کی ملکیت ہے لیکن مکان میں کرایہ داری سے متعلق کوائف سے متعلقہ تھانے میں اندراج نہ کرایا گیا جبکہ ڈسٹرکٹ مجسٹریٹ اسلام آباد نے 22جولائی سے ضلع بھر میں دفعہ144نافذ کر رکھی ہے اور عرفان صدیقی نے کرایہ اداری کے کوائف جمع نہ کرا کے تعزیرات پاکستان کی دفعہ 188کا ارتکاب کیا ہے رمنا پولیس نے مقدمہ میں نامزد عرفان یقی اور ان کے کرایہ دار جاوید اقبال کو گرفتار کر کے گزشتہ روز مجاز عدالت میں پیش کیا تھا جہاں سے عدالت نے دونوں کو14روزہ جوڈیشل ریمانڈپر اڈیالہ جیل بھیجنے کا حکم دیا تھا انہیں ہفتہ کی سہ پہر اڈیالہ جیل منتقل کر دیا گیا۔ دوسری جانب پاکستان مسلم لیگ (ن)کی ترجمان مریم اورنگزیب نے نامور ماہرتعلیم، استاد، مصنف، دانشور، معروف کالم نگار اور وزیراعظم کے سابق مشیر عرفان صدیقی کی گرفتاری کی مذمت کرتے ہوئے کہاہے کہ استادوں کو ہتھکڑیاں لگانے والی آمر حکومت نے 78 سالہ عرفان صدیقی کو گرفتار کرکے بھینس چوری کے مقدمے کی یاد تازہ کر دی ہے۔ ایک بیان میں انہوں نے کہاکہ عرفان صدیقی کو نواز شریف کا دیرینہ ساتھی ہونے کی سزا دی جارہی ہے۔ انہوں نے کہاکہ عمران صاحب اگر نواز شریف سے تعلق کی بنا پر سزا دینی ہے تو پھر کروڑوں عوام کو بھی جیل میں ڈال دیں۔انہوں نے کہاکہ ایک صاحب علم، استاد اور قلم سے جڑے شخص کی گرفتاری ثبوت ہے کہ عمران صاحب انتقام میں پاگل ہو چکے ہیں۔انہوں نے کہاکہ عمران صاحب غیرقانونی بنی گالہ محل ریگولرائز کرالیتے ہیں، دوسروں کو جیل میں ڈالتے ہیں۔
