اسلام آباد (این این آئی)پاکستان مسلم لیگ (ن) کی ترجمان مریم اورنگزیب نے برطانوی اخبار کی خبر میں لگائے گئے الزمات بے بنیاد اور پراپگنڈہ مہم قرار دے دئیے۔ ایک بیان میں انہوںنے کہاکہ شائع ہونے والی خبر کے پہلے پانچ حصوں میں شہباز شریف شریف کی کارکردگی اور ان کے منصوبوں کی تعریف کی گئی۔
خبر کے مشکوک ذرائع والے حصے میں تمام سازشی نظریات اور الزامات عائد کیے گئے ہیں۔ انہوں نے کہاکہ خبر میں کسی برطانیہ کے سرکاری رپورٹ کا ذکر نہیں ، خبر من گھڑت، بے بنیاد اور جھوٹ کا پلندہ ہے جو عمران صاحب کا سازشی ذہنی اختراع ہے ۔ انہوں نے کہاکہ عمران صاحب نے برطانوی اخبار کے لاہور میں مقیم متنازعہ صحافی کے زریعے بے بنیاد، حقائق کے برعکس خبر شائع کرائی ۔انہوں نے کہاکہ برطانوی اخبار کی خبر میں ایمنسٹی انٹرنیشنل سمیت دیگر عالمی اداروں اور ڈیفیڈ کی جانب سے فنڈز کی شفافیت کا اعتراف کیاگیا ہے ۔ انہوں نے کہاکہ شہبازشریف نے ایک ایک پائی ایمانداری اور شفافیت سے خرچ کی ۔ انہوں نے کہاکہ اسی خبر میں ہے کہ گزشتہ برس ڈیفیڈ ہیڈ جونا راولی نے شہبازشریف کے جذبے اور عزم کو سراہا تھا۔ انہوں نے کہاکہ رچرڈ مونٹگومری نے کہا تھا کہ شہباز شریف کی زیر قیادت پنجاب غیر معمولی اور تاریخی ترقی کر رہا ہے۔ انہوں نے کہاکہ ایسی خبریں پاکستان کی جگ ہنسائی کے لئے شائع کرائی جارہی ہیں ۔ انہوں نے کہاکہ یہ براہ راست امدادی رقوم کا پاکستان میں راستہ رکوانے کی سازش ہے۔ انہوں نے کہاکہ جھوٹی خبر کے ذریعے برطانوی امدادی ادارے کو بدنام کرنے کا اوچھا ہتھکنڈا اختیار کیا گیا ۔
انہوں نے کہاکہ خبر شائع کرنے والے اخبار کی شہرت، ساکھ اور کردار سب جانتے ہیں۔ انہوںنے کہاکہ اصل خبرعمران نیازی کے اٹھارہ جعلی اکاونٹس کی ہے جس سے خوف طاری ہوا ہے ۔ انہوں نے کہاکہ اصل اورسچی خبر برطانیہ سے آنی ہے جو اربوں ڈالر خوردبرد اور منی لانڈرنگ سے متعلق ہے ۔ انہوں نے کہاکہ یہ عمران نیازی کا تازہ اوچھا ہتھکنڈہ ہے، وہ عوام کی نظریں کل کی ملک گیر کامیاب ہڑتال سے ہٹانا چاہتے ہیں ۔
انہوں نے کہاکہ عمران صاحب ایسی خبریں چھپوا کر آپ گزشتہ روز کی کامیاب ہڑتال کو ناکام نہیں بناسکتے ۔ انہوں نے کہاکہ عمران صاحب کوئی اور چال چلیں، جھوٹے، بے بنیاد میڈیا ٹرائل کا ہتھکنڈا ناکام ہوچکا ہے ۔ انہوں نے کہاکہ متعلقہ برطانوی اخبارکی وہی شہرت ہے جو موجودہ کرائے کے ترجمانوں کی ہے ۔ انہوں نے کہاکہ اس اخبار پر ڈیوڈ روز جھوٹی خبر پر پابندی لگی ۔ انہوں نے کہاکہ اخبار نے عمران صاحب کے بارے میں کئی خبریں شائع کیں ۔انہوں نے کہاکہ جج ارشد ملک کی وڈیو سے جو طوفان اٹھا ہے۔
اس کا رْخ موڑنے کے لئے برطانیہ میں کچھ لوگوں کی منت سماجت کی گئی ۔ انہوں نے کہاکہ برطانوی حکومت نے فراہم کردہ فنڈز کا غیرجانبدارانہ آڈیٹرز سے آڈٹ کرایا اورحکومت پنجاب کی کاوشوں کو سراہا۔ انہوںنے کہاکہ حکومت پنجاب نے ایمانداری، دیانتداری سے قوم کے سرمائے اور بیرون ملک سے آنے والے فنڈز کو عوام کی فلاح وبہبود پر خرچ کیا۔انہوں نے کہاکہ برطانوی حکومت بخوبی جانتی ہے کہ تاریخ میں پہلی بار برطانیہ سے آنے والے فنڈز کو کس قدر محنت، شفافیت اور ایمانداری سے منصوبوں میں خرچ کیاگیا ۔
انہوں نے کہاکہ 2018 میں عالمی ساکھ رکھنے والے جریدے اکانومسٹ نے رپورٹ دی تھی کہ پاکستان میں تعلیم کا انقلاب آ رہا ہے ۔ انہوں نے کہاکہ عالمی جریدے کی رپورٹ میں گواہی دی گئی تھی کہ پنجاب میں شہبازشریف نے جو کام کیا وہ دہائیوں میں نہیں ہوا ۔ انہوں نے کہاکہ بعض لوگوں کی خواہش اور کوشش ہے کہ جج وڈیو سکینڈل کو دبا دیا جائے۔ انہوں نے کہاکہ سچائی اور نوازشریف پر ہونے والے ظلم کو چھپانے کے لئے جھوٹ گھڑنے والی مشینری کسی بھی حد تک جاسکتی ہے۔
