لاہور(این این آئی) پاکستان مسلم لیگ کی مرکزی نائب صد رمریم نواز نے کہا ہے کہ گزشتہ روز بھی صرف پانچ خونی رشتہ داروں کو نواز شریف سے کڑی نگرانی میں ملاقات کی اجازت دی گئی،پاکستان کی معیشت زبوں حالی کا شکار ہے،جعلی وزیر اعظم انتقامی کارروائیوں کی بجائے معیشت پر توجہ دے۔ انہوں نے اپنے ٹوئٹر بیان میں کہا کہ یہ اقدام انسانی حقوق کی صریحاً خلاف ورزی ہے۔

انہوں نے کہا کہ نواز شریف کو انجائنا کی تکلیف پر بار بار کی درخواستوں کے باوجود ذاتی معالج کوان سے ملنے کی اجازت نہیں دی گئی۔ انہوں نے کہاکہ اگر یہ جعلی حکومت اب بھی ان کے ڈاکٹر کو ان سے ملاقات کی اجازت نہیں دیتی اور خداناخواستہ مرض بڑھتا ہے تو مسلم لیگ (ن) کے کروڑوں ووٹروں اور 22 کڑوڑ عوام کو خبر ہونی چاہئے کہ کس کا گریبان پکڑنا ہے۔ انہوں نے کہا کہ اگر میرے اصولی موقف پر جعلی حکومت کا یہی رد عمل ہے تو خبر دار رہیں کہ میں خاموش تماشائی نہیں بنوں گی۔انہوں نے کہا کہ جعلی وزیر اعظم سیاسی انتقامی کارروائیوں پر اترا ہوا ہے۔پاکستان کی معیشت زبوں حالی کا شکار ہے،جعلی وزیر اعظم انتقامی کارروائیوں کی بجائے معیشت پر توجہ دے۔انہوں نے کہاکہ انٹرنیشنل کریڈٹ ریٹنگ ایجنسی نے پاکستان کی معیشت کی منفی ریٹنگ بتائی ہے۔ایسا ہی ہوتا ہے جب 220 ملین آبادی والے ملک کو ایک ایسے انسان کے حوالے کر دیا جائے جس کی واحد قابلیت کسی اور کو خوش کرنا ہو۔انہوں نے کہاکہ پاکستان کا روپیہ 142 فی ڈالر تھا جب آئی ایم ایف سے معاہدہ ہوا، جو کہ اب 164 تک پہنچ گیا ہے۔ انہوں نے کہاکہ اب تو تاریخ بھی اس کو سلیکٹڈکے لقب سے پکارے اور یاد رکھے گی، یہ لفظ اب اس کا تعاقب کرے گا اور اس کی جان نہیں چھوڑے گا۔