لاہور(آن لائن) وفاقی وزیر برائے سائنس و ٹیکنالوجی فواد چودھری نے کہا ہے کہ شہباز شریف منتیں کر کے ملک سے باہر گئے لیکن ان کی حرکتوں سے لگتا نہیں کہ وہ دوبارہ واپس آئیں گے لیکن ہم کھینچ کر لے آئیں گے ۔ پیر کے روز لاہور ہائی کورٹ کے باہر پی ٹی آئی علیم خان سے اظہار یکجہتی کے لئے آئے فواد چودھری نے صحافیوں سے گفتگو کرتے ہوئے کہا کہ ہمیں امید ہے کہ ضرور انصاف ملے گا ۔ آئی ایم ایف کے اعلامیہ سے واضح ہے کہ ہم گزشتہ حکومتوں کی کرتوتوں سے یہاں تک پہنچے۔
حالانکہ حکومت کو احساس ہے کہ عوام مہنگائی کی چکی میں پس رہی ہے ۔ لیکن اب باہر سے پیسے لئے گئے ہیں جو واپس تو کرنے ہیں ۔ فواد چودھری نے ایک سوال کے جواب میں کہا کہ شہباز شریف منتیں کر کے ملک سے باہر تو گئے ہیں لیکن ان کی کرتوتوں سے نہیں لگتا کہ وہ ملک دوبارہ واپس آئیں گے لیکن ہم انہیں کھینچ کر لائیں گے ۔انہوں نے مزید کہا کہ نواز شریف بھی چھ ہفتے کے لئے علاج کے بہانے جیل سے باہر آئے لیکن اب وہ پھر دوبارہ جیل میں ہیں ۔ میڈیکل بھی دیا عدالت نے مسترد کر دیا ۔
