راولپنڈی(این این آئی)اڈیالہ جیل میں قیدیوں کی جانب سے بیرکوں کے اندر اور باہر سرعام جوئے کی محفلیں سجنے کا انکشاف ہوا ہے۔نجی ٹی وی کے مطابق موصول ہونے والی ویڈیوز میں دیکھا گیاکہ قیدی بے دھڑک تاش کے پتوں پرہزاروں روپے کی بازی لگاتے رہے۔جوئے کی محفلوں کے ساتھ جیل میں موبائل فون کا استعمال بھی عام ہوگیا۔جن قیدیوں کو یہ سہولیات حاصل ہیں ان میں دہشتگردی،

قتل اور ڈکیتی جیسی سنگین وارداتوں میں ملوث قیدی بھی شامل ہیں۔یاد رہے کہ گزشتہ سال مئی میں نیشنل کاونٹر ٹیرارزم اتھارٹی (نیکٹا) کی جاری کردہ رپورٹ میں بتایا گیا تھا کہ ملک بھرکی جیلوں میں قیدیوں کی تعداد گنجائش سے زیادہ ہو گئی ہے۔رپورٹ کے مطابق اس وقت پنجاب کی 40 جیلوں میں 50 ہزار 405 قیدی موجود ہیں جبکہ گنجائش 30 ہزار 74 کی ہے اسی طرح سندھ کی 26 جیلیں 12 ہزار 245 قیدی رکھ سکتی ہیں لیکن یہاں بھی گنجائش سے کہیں زیادہ 18 ہزار 998 افراد قید ہیں۔رپورٹ میں بتایا گیا کہ خیبر پختونخوا کی صورتحال بھی کچھ مختلف نہیں، 22 جیلوں میں 7 ہزار 587 کے بجائے 11 ہزار 330 قیدی موجود ہیں تاہم بلوچستان میں قیدیوں کی تعداد گنجائش سے کم ہے۔نیکٹا کے مطابق بلوچستان کی 11 جیلوں میں دوہزار 585 قیدیوں کی گنجائش ہے جبکہ یہاں دو ہزار 427 افراد قید ہیں۔