اسلام آباد(مانیٹرنگ ڈیسک)ن لیگ حکومت کی ناقص منصوبہ بندی کا ایک اور کیس سامنے آ گیا۔ پشاور میں عالمی طرز کا ائیرپورٹ بنا دیا گیا لیکن پارکنگ نہ بنائی گئی۔میڈیا رپورٹس کے مطابق گزشتہ دورِحکومت میں باچا خان انٹر نیشنل ائیرپورٹ کے توسیعی منصوبے پر کام شروع کیا گیا لیکن منصوبہ بنانے والے ائیرپورٹ پر آنے والے مسافروں کے لیے پارکنگ بنانا بھول گئے۔

جس کی وجہ سے مسافر اور ان کے ساتھ آنے والے رشتہ دار اور دوست احباب کو شدید تکلیف کا سامنا ہے۔دریں اثنا گزشتہ روز پشاور کے باچا خان انٹرنیشنل ایئرپورٹ کا جدید انٹرنیشنل ارائیول لاوٴنج مسافروں کیلئے کھول دیا گیا۔پشاورباچا خان انٹر نیشنل ائیرپورٹ حکام کے مطابق پشاور ایئرپورٹ کے ارائیول لاوٴنج کو دور جدید کے تقاضوں کے مطابق تعمیر کیا گیا ہے اور بین الاقوامی آمد کے لاوٴنج پر 2 بورڈنگ برجز بھی نصب کیے گئے ہیں جن سے مسافر جہازوں پر سوار ہو سکیں گے۔ انٹر نیشنل ارائیول لائونج میں بیرونِ ممالک سے آنے والے مسافروں کی سہولت کیلئے دو خودکار زینے اور تین لفٹیں بھی نصب کی گئی ہیں۔سول ایوی ایشن ترجمان کا کہنا ہے کہ باچا خان انٹر نیشنل ایئرپورٹ کے اس بین الاقوامی آمدکے لاؤنج کو ساڑھے تین ارب روپے کی لاگت سے تعمیر کیا گیا ہے ، بیرون ممالک سے آنے والے مسافروں کے لئے امیگریشن کاوٴنٹرز کی تعدادمیں اضافہ ہو گیا ہے۔البتہ بیرون ملک سے آنے والے مسافروں اور مسافروں کو لے کر جانے والے رشتہ داروں کو ائیرپورٹ پرشدید مشکلات کا سامنا ہے۔ ان کا کہنا تھا ائیر پورٹ پر سہولتیں تو موجود ہیں لیکن گاڑیوں کی پارکنگ کا مسئلہ ابھی تک حل نہیں کیا جاسکا۔