اسلام آباد(مانیٹرنگ ڈیسک)پاکستان کے دشمنوں کا ایک اور پروپیگنڈہ بے نقاب، 3سال سے لاپتہ حمل خان مری گوادر پی سی ہوٹل حملے میں شامل نکلا۔ تفصیلات کے مطابق حمل خان مری دشمن ملک سے تربیت حاصل کر کے پاکستان آیا اور اس نے گوادر میں ہوٹل پر حملہ کیا۔

حمل خان 3سال تک پاکستان کے دشمنوں کا آلہ کار بنا رہا اور اس کی گمشدگی سے متعلق ویب سائٹس پر شور مچایا جاتا رہا کہ اسے سکیورٹی اداروں نے لاپتہ کیا ہے۔اس سے پہلے بھی چینی سفارت خانے پر ہونے والے حملے میں لاپتہ شخص ملوث پایا گیا تھا۔ دوسری جانب چین نے گوادر حملے پر شدید مذمت کا اظہار کرتے ہوئے اسے اقتصادی منصوبوں کو نقصان پہنچانے کی کوشش قرار دیا ہے۔تفصیلات کے مطابق چینی سفارت خانے کی جانب سے جاری بیان کے مطابق گوادر میں دہشت گردانہ کارروائی سے اقتصادی منصوبوں کو نقصان پہنچانے کی کوشش کی گئی، مگر پاکستانی قوم اور فورسزدہشت گردوں کا ایجنڈا کامیاب نہیں ہونے دیں گے ۔اپنے بیان میں چینی سفارت خانے نے شہید گارڈز کے ورثا سے اظہار تعزیت اور زخمی اہلکاروں سے اظہارہمدردی کیاہے۔واضح رہے کہ گذشتہ روز گوادر پی سی ہوٹل پر دہشتگردوں کے حملے میں2 سکیورٹی گارڈ شہید ہوئے تھے جبکہ سیکیورٹی فورسز کی بھرپور جوابی کارروائی میں تین دہشت گرد ہلاک ہوئے تھے، ہوٹل پر حملے کی ذمے داری بلوچ لبریشن آرمی نے قبول کی تھی۔