لاہور(آن لائن)لاہور کے علاقے فیکٹری ایریا میں گھرمیں خوفناک آتشزدگی کے نتیجے میں 3معصوم بچے جاں بحق ہو گئے ۔پولیس ذرائع کے مطابق لاہورکے علاقے والٹن روڈ پرفیکٹری ایریا میں گھرمیں لگنے والی آگ نے 3معصوم بچوں کی جان لے لی جبکہ بچی سمیت 2افراد زخمی بھی ہوئے۔پولیس کے مطابق گھرکی بالائی منزل پرواقع کمرے میں بچے کھیل رہے تھے کہ اچانک آگ بھڑک اٹھی، جس نے بالائی

منزل کے بیشتر حصے کو اپنی لپیٹ میں لے لیا۔ اطلاع ملنے پر پولیس اورامدادی ٹیمیں موقع پر پہنچ گئیں جنہوں نے 5 سالہ حبیبہ اورعلی کو مردہ حالت میں نکال لیا جبکہ 30 سالہ عمران اور 2سالہ نبیہہ کوزخمی حالت میں جناح اسپتال منتقل کیا گیا، جہاں نبیہہ بھی جانبرنہیں ہوسکی۔ پولیس کا کہنا ہے کہ ابتدائی تحقیقات کے دوران واقعہ شارٹ سرکٹ کا نتیجہ معلوم ہوتا ہے ،تاہم مختلف پہلوؤں پرتحقیقات کی جا رہی ہیں۔