بیجنگ (مانیٹرنگ ڈیسک)چین نے شادی کی آڑ میں پاکستانی خواتین کی جسم فروشی کی خبریں مسترد کردیں، چین نے چینی شہریوں سے شادی کے بعد پاکستانی خواتین سے زبردستی جسم فروشی اور ان کے اعضاء کی فروخت کی خبروں کو مسترد کردیا۔پاکستان میں چینی سفارتخانے کی جانب سے جاری ایک بیان میں کہا گیا ہے کہ چین کی وزارت پبلک سیکیورٹی نے پاکستانی میڈیا میں چلنے والی

خبروں کی تحقیقات کی ہیں جن میں یہ بات سامنے آئی ہے کہ شادی کے بعد چین میں رہنے والی پاکستانی خواتین سے زبردستی جسم فروشی کروانے یا ان کے اعضاء فروخت ہونے کی اطلاعات درست نہیں ہیں۔دریں اثنا اسلام آباد ائیرپورٹ سے پاکستانی لڑکیوں کو چین اسمگل کرنے کی کوشش ناکام بنا دی گئی ۔ جمعہ کو وفاقی تحقیقاتی ایجنسی (ایف آئی اے) نے اسلام آباد ائیرپورٹ پر کارروائی کرتے ہوئے چینی اور پاکستانی جوڑے کو گرفتار کرلیا۔ایف آئی اے کے مطابق گرفتار افراد خود کو شادی شدی ظاہر کرکے چین جارہے تھے اور گرفتار چینی پاکستانی خواتین کواسمگل کرکے چین لے جارہے تھے۔ایف آئی اے حکام نے بتایا کہ گرفتار کیے جانے والوں میں دو چینی لڑکے اور 3 پاکستانی لڑکیاں شامل ہیں ،گرفتار چینی اعضاء کی خریدوفروخت کا مکروہ دھندہ کرتے ہیں۔واضح رہے کہ پاکستانی لڑکیوں کو شادی کا جھانسہ دے کر چین لے جانے اور ان سے جسم فروشی کرانے والے چائنیز گینگز کے خلاف فورسز کی کارروائیاں جاری ہیں جس میں اب تک کئی چائنیز باشندوں کو گرفتار کیا گیا۔