لاہور (این این آئی) مسلم لیگ (ن) کی ترجمان مریم اورنگزیب نے پنجاب حکومت کی جانب سے پرامن کارکنان کے خلاف پرچہ درج کرنے کی شدید مذمت کرتے ہوئے کہاہے کہ عمران صاحب نہ کوئی پارلیمنٹ پرحملہ ہوا، نہ سرکاری املاک کو نقصان پہنچا، نہ سول نافرمانی، نہ”گلے سے گھسیٹ دو“کے نعرے لگے اور نہ ہی پولیس والوں کے سر ہی پھٹے، پھر پر امن کارکنوں پر یہ مقدمہ کیوں؟

عمران صاحب آپ کے حکم پر مسلم لیگ (ن) کے پر امن کارکنوں کے خلاف مقدمہ افسوسناک ہے۔انہوں نے کہاکہ عمران خان ہماری آواز اب آپ کا عوام پر ظلم کا ہر راستہ بند کرے گی، جتنے مقدمے کرنے ہیں شوق سے کریں،یہ مقدمے اب ہمارا راستہ نہیں اور نہ عوام کی آواز کو روک سکتے۔ انہوں نے کہاکہ عمران صاحب نہ کوئی پارلیمنٹ پہ حملہ ہوا، نہ سرکاری املاک کو نقصان پہنچا، نہ سول نافرمانی اور ہنڈی کی کال دی، نہ”گلے سے گھسیٹ دو“کے نعرے لگے اور نہ ہی پولیس والوں کے سر ہی پھٹے، پھر پر امن کارکنوں پہ یہ مقدمہ کیوں؟۔عمران صاحب مقدمہ میں لکھا ہے کہ حکومت کے خلاف نعرے لگے ہیں تو آپ کو آپ کی عوام دشمنی، نالائقی اور نااہلی پر سلامی دیتے آپ تو گالیاں دیتے رہے پھر بھی آپ پر کوئی پرچہ نہ ہوا۔مسلم لیگ (ن) کے پر امن کارکن اور ورکر اپنے قائد کے ساتھ محبت اور اظہارِ یکجہتی کرنے جیل تک کیا گئے آپ اتنے خوفزدہ ہو گئے کہ مقدمہ درج کرا دیا۔دریں اثناء  مسلم لیگ (ن) کے قائد نوازشریف کی جیل واپسی کے موقع پرلیگی کارکنان کے خلاف ریلی نکالنے پر کوٹ لکھپت میں سب انسپکٹر امجد قمر کی مدعیت میں مقدمہ درج کرلیا گیا،مقدمہ ساؤنڈ سسٹم ایکٹ اور ریلوے ایکٹ کی خلاف ورزی پر درج کیا گیا۔تھانہ کوٹ لکھپت میں درج مقدمے کی ایف آئی آر کے متن میں کہا گیا ہے کہ لیگی کارکنان نے نے شنگھائی پل کے قریب روڈ کو بلاک کیے رکھا،کارکنان نے گاڑیوں پر ساؤنڈ سسٹم لگا رکھے تھے،کارکنان سپیکر میں حکومت کیخلاف نعرے بازی کرتے رہے اور لیگی کارکنان نے کوٹ لکھپت ریلوے ٹریک پر ٹرین کو بھی روکا۔ مقدمے میں (ن) لیگ کے 14سوسے 15سو نامعلوم کارکنوں کو نامزد کیا ہے۔