لاہور( این این آئی)داتا دربار کے باہر ہونے والے خود کش دھماکے کی سی سی ٹی وی فوٹیج سامنے آ گئی ۔ فوٹیج میں واضح دیکھا جا سکتا ہے کہ رکاوٹوں کے اندر ایلیٹ فورس کی ایک گاڑی کھڑی ہے ۔ اسی دوران ایک نوجوان بائیں جانب سے آتا ہے اور جیسے ہی وہ ایلیٹ فورس کی گاڑی کے بالکل قریب پہنچتا ہے تو دھماکہ ہو جاتا ہے ۔
اس مبینہ خود کش حملہ آور کے پیچھے ایک نو عمرلڑکا اور قریب سے دیگر لوگ بھی گزر رہے ہیں جو دھماکے کی زد میں آگئے ۔ دریں اثناصوبائی وزیر اوقاف پیر سیدسعید الحسن شاہ اور معاون خصوصی وزیراعلیٰ سید رفاقت علی گیلانی نے داتا دربار کے گیٹ نمبر2پر ہونے والے بم دھماکہ کی جگہ کا دورہ کیا۔اس موقع پر ایڈیشنل سیکرٹری اوقاف ،ڈائریکٹر جنرل اوقاف اورایڈمنسٹریٹر داتا دربار بھی ان کے ہمراہ تھے۔وزیر اوقاف اور معاون خصوصی نے سکیورٹی اہلکاران کی شہادت پر گہرے دکھ اور رنج کا اظہار کیا اور ان کی مغرفت کے لئے دعا کی۔بم دھماکہ سے سکیورٹی اہلکاران کی گاڑی مکمل طور پر تباہ ہوئی جبکہ ایک پرائیویٹ سکیورٹی گارڈ کی بھی شہادت ہوئی۔اردگرد کی عمارتوں اور دکانوں کے شیشے ودروازے ٹوٹ کر زمین پر گرے ہوئے تھے۔جائے وقوعہ پر خون ہی خون نظر آرہا تھا۔اس موقع پر وزیراوقاف نے میڈیا سے گفتگو کرتے ہوئے کہا کہ سکیورٹی اہلکاروں نے مشکوک شخص کی تلاشی لینے کی کوشش کی تو خودکو بم دھماکہ سے اڑا لیا۔ان سکیورٹی اہلکاروں نے اپنی جانوںکا نذرانہ دے کر ایک بہت بڑے سانحہ سے قوم کو بچا لیا۔انہوں نے کہا کہ صوبہ بھر کے تمام درباروں اوراس کے گردونواح میں سکیورٹی انتظامات کو مزید سخت کر دیا گیا ہے۔
انہوں نے عوام سے اپیل کی کہ اگر وہ کسی بھی جگہ کسی مشکوک شخص کو دیکھیں تو اس کی فوری اطلاع کو قانون نافذ کرنے والے اداروں کو فوری دیں۔انہوں نے کہا کہ داتا دربار کے اردگرد سیف سٹی کیمروں کی تعداد کو مزید بڑھایا جائے گا تاکہ لوگوں کی حفاظت مزید بہترانداز میں ہو سکے۔آخر میں وزیراوقاف نے میوہسپتال میں زخمیوںکی عیادت بھی کی اور ان کی جلد صحت یابی کے لئے دعا کی۔
