لاہور (این این آئی) پاکستان مسلم لیگ (ن) لاہور کے جنرل سیکرٹری خواجہ عمران نذیر نے کہا کہ کارکن کسی افواہ پر کان نہ دھریں، مسلم لیگ (ن) کے قائد محمد نواز شریف طے شدہ شیڈول کے مطابق اپنی رہائشگاہ سے روانہ ہونگے اور رات بار ہ بجے سے پہلے سرنڈر کر دیں گے۔ ذرائع کے مطابق ضلعی انتظامیہ نے
لیگی رہنماؤں کو یہ پیغام پہنچایا تھا کہ نواز شریف جیل قوانین کے مطابق 7مئی شام 6 بجے سے پہلے سرنڈر کر دیں اورکوٹ لکھپت جیل پہنچ جائیں۔جیل میں انہیں نیا قیدی نمبر الاٹ کیا جائے گا۔دوسری جانب مسلم لیگ (ن)کے رہنماؤ ں نے اس حوالے سے انتظامیہ کو اپنے موقف سے آگاہ کر دیا ہے جسے انہوں نے جیل حکام تک پہنچا دیا ہے۔مسلم لیگ (ن) لاہور کے جنرل سیکرٹری خواجہ عمران نذیر نے نوازشریف کی جیل واپسی پروگرام میں تبدیلی کی تردیدکرتے ہوئے کہاکہ کارکن جیل انتظامیہ کی نوازشریف کو شام چھ بجے کے بعد قبول نہ کرنے والی افواہوں پر کان نہ دھریں۔نوازشریف طے کر دہ پروگرام کے تحت جاتی امرا ء سے کوٹ لکھپت جیل روانہ ہوں گے۔لیگی کارکنان شام سات بجے شنگھائی چوک پر اکٹھے ہوں گے۔ نوازشریف کی دوبارہ گرفتاری پر کارکنان پرامن احتجاج کریں گے۔انہوں نے کہاکہ ہم نے ضلعی انتظامیہ کو (ن) لیگ کا موقف دیدیا ہے۔ضلعی انتظامیہ نے سکیورٹی ایشوز پر پروگرام موخر کرنے کی اپیل کی جسے ہم نے مسترد کر دیاہے۔ نوازشریف رات بارہ بجے سے پہلے کوٹ لکھپت جیل میں سرنڈر کریں گے۔
