اسلام آباد (این این آئی) پاکستان تحریک انصاف نے سابق وزیر اعظم نوازشریف کی صاحبزادی مریم نواز کو مسلم لیگ (ن) کا نائب صدر مقرر کیے جانے کے فیصلے کو عدالت میں چیلنج کرنے کا فیصلہ کیا ہے۔ذرائع کے مطابق تحریک انصاف کی قیادت کو مریم نواز کے مسلم لیگ (ن) کے نائب صدر بننے پر اعتراض ہے اور قیادت نے اس کو عدالت میں چیلنج کرنے کا فیصلہ کیا ہے۔ایک روز قبل وزیر خارجہ شاہ محمود قریشی نے مؤقف اختیار کیا کہ سزا یافتہ مریم نواز کو مسلم لیگ (ن) کا نائب صدر کیسے بنایا جاسکتا ہے، عدالت سے سزا یافتہ ملزم کو پارٹی عہدہ نہیں دیا جاسکتا ہے۔ذرائع کے مطابق شاہ
محمود قریشی نے مزید مؤقف اختیار کیاکہ مریم نواز کو سزا معطلی کا عارضی ریلیف ملا ہے اور ان کی سزا ختم نہیں ہوئی۔ذرائع نے بتایا کہ شاہ محمود قریشی نے مریم نواز کے پارٹی عہدے پر پارٹی رہنماؤں اورقانونی ماہرین سے مشاورت شروع کردی ہے، وزیر خارجہ مریم نواز کو پارٹی عہدہ ملنے پر الیکشن کمیشن سے رجوع کرنے پر بھی غور کررہے ہیں۔واضح رہے کہ گزشتہ دنوں مسلم لیگ (ن) میں تنظیم سازی کی گئی ہے جس کے تحت 16 نائب صدور میں مسلم لیگ (ن) کی رہنما اور نوازشریف کی صاحبزادی مریم نواز جب کہ شہبازشریف کے صاحبزادے حمزہ شہباز کو بھی نائب صدر مقرر کیا گیا ہے۔
