اسلام آباد (این این آئی) حکومت نے بجلی چوری کی روک تھام کیلئے اپوزیشن سے مدد مانگ لی۔پیر کو قومی اسمبلی میں وزیر دفاع پرویز خٹک نے بجلی چوری کیخلاف ایوان کی کمیٹی بنانے کی تجویز پیش کرتے ہوئے کہا کہ بجلی چوری کی روک تھام کیلئے اپوزیشن مدد کرے، عوام کو ریلیف دینے کیلئے بھی اقدامات کئے جائیں۔وزیر توانائی عمر ایوب نے تحریری جواب دیتے ہوئے بتایا کہ امریکی اور اقوام متحدہ کی پابندیوں کی وجہ سے پاک ایران بجلی منصوبہ التوا کا شکار ہے،ایران نے 3 ہزار میگاواٹ بجلی کی پیش کش کی ہے،1000 میگاواٹ کی فراہمی کیلئے ایران

اور پاکستان کے درمیان ایم او یو پر دستخط ہوچکے ہیں۔ انہوں نے بتایا کہ 23فروری 2015ء کو پاک ایران نے ہزار میگاواٹ سے 3 ہزار میگاواٹ تک اضافے پر اتفاق بھی کیاہے،ایک ہزار میگاواٹ پہلے مرحلے کے طور پر تصور کیا جائے گا، ضروری کام پہلے ہی مکمل ہوچکا ہے۔ انہوں نے کہا کہ منصوبے کا مستقبل کے جائزوں کے نتائج کی بنیاد پر کیا جائے گا۔انہوں نے بتایا کہ رمضان المبارک میں سحر و افطار میں لوڈ شیڈنگ نہیں ہوگی، دو اوقات میں بجلی کا دورانیہ 10 گھنٹے کا ہوگا۔ انہوں نے کہاکہ پورے ملک میں اس وقت مجموعی طور پر چار گھنٹے کی لوڈ شیڈنگ ہے۔