اسلام آباد (این این آئی) پاکستان مسلم لیگ (ن )کی رکن مریم اورنگزیب نے ڈیم فنڈ تفصیلات ایوان میں پیش کرنے کا مطالبہ کرتے ہوئے کہا ہے کہ اب تک کتنی رقم ڈیم فنڈ میں جمع ہوئی اور یہ فنڈ ریزنگ کب تک جاری رہے گی۔ جمعہ کو وفقہ سوالات کے دور ان پاکستان مسلم لیگ (ن)کی رکن اسمبلی

مریم اورنگزیب نے کہاکہ وزیر آبی وسائل نے کہا تھا کہ وہ ڈیم فنڈ کی شفافیت سے لاعلم ہیں۔انہوں نے ڈیم فنڈ تفصیلات ایوان میں پیش کرنے کا مطالبہ کرتے ہوئے کہا کہ اب تک کتنی رقم ڈیم فنڈ میں جمع ہوئی اور یہ فنڈ ریزنگ کب تک جاری رہے گی۔ وزیر مملکت برائے پارلیمانی امور علی محمد خان نے کہاکہ حکومت ڈیم فنڈ سمیت ہر معاملے میں شفافیت پر یقین رکھتی ہے۔انہوںنے کہاکہ وزیر آبی وسائل ملک سے باہر ہیں، واپسی پر مکمل تفصیل ایوان میں پیش کریں گے۔محسن داوڑ نے کہاکہ کرم تنگی ڈیم کے فیز ٹو میں شمالی وزیرستان کے ایک پورے شہر کے ڈوبنے کا خدشہ ہے۔انہوںنے کہاکہ وزیراعلی نے یقین دھانی کرائی تھی کہ یہ ڈیم نہیں بنے گا۔وفاقی وزیر مراد سعید نے کہاکہ کرم تنگی ڈیم کے حوالے سے جرگے کیے گئے، مقامی لوگوں کے خدشات کو دور کرنے کی کوشش کررہے ہیں۔ مراد سعید نے کہاکہ یہ پاکستان اور قبائلی علاقوں کی فلاح کا منصوبہ ہے، جب تک ایک ایک شخص کو مطمئن نہ کیا، ڈیم نہیں بنے گا۔