اسلام آباد (این این آئی) اسلام آباد چیمبر آف کامرس اینڈ انڈسٹری کے صدر احمد حسن مغل کی قیادت میں تاجر نمائندوں کے ایک وفد نے وزیر مملکت برائے ریونیو محمد حماد اظہر سے ملاقات کی اور ٹیکس نظام کو بہتر کرنے کیلئے ان کے ساتھ مختلف امور پر تبادلہ خیال کیا۔ وفد میں مرکزی انجمن تاجراں کے صدر اجمل بلوچ، پی ٹی آئی ٹریڈرز ونگ اسلام آباد کے صدر چوہدری ندیم الدین، آل ٹریڈرز ویلفیئرایسوسی ایشن بلیو ایریا کے صدر یوسف راجپوت،

اسلام آباد اسٹیٹ ایجنٹس ایسوسی ایشن کے صدر سردار طاہر محمود، شیخ اویس، چوہدری عرفان، سردار عابد، ، خالد چوہدری اور دیگر شامل تھے۔وفد سے خطاب کرتے ہوئے وزیر مملکت برائے ریونیو محمد حماد اظہر نے کہا کہ تاجر برادری کو ٹیکس کی ادائیگی میں سہولت فراہم کرنے اور ان کی ٹیکس سے متعلقہ مشکلات کو کم کرنے کیلئے حکومت آئندہ بجٹ میں ان پر فکسڈ ٹیکس عائد کرنے پر غور کر رہی ہے لہذا تاجربرادری کے نمائندگان اس نظام کو کامیاب بنانے کے بارے میں اپنی تجاویز دیں ۔انہوں نے کہا حکومت چاہتی ہے کہ تاجر برادری کی مشاورت سے ٹیکس نظام کو بہتر کیا جائے اور خاص طور پر فکسڈ ٹیکس نظام کو کامیاب بنا کر ٹیکس کے دائرہ کار کو مزید وسعت دی جائے لہذا اس سلسلے میں تاجر برادری اپنی تجاویز دے جن پر ہمدردانہ غور کیا جائے گا۔ اس موقع پر اپنے خیالات کا اظہار کرتے ہوئے اسلام آباد چیمبر آف کامرس اینڈ انڈسٹری کے صدر احمد حسن مغل نے کہا کہ ٹیکس کے دائرہ کار کو بہتر کرنے کیلئے حکومت تاجر برادری کو ایسی مراعات فراہم کرے جس سے زیادہ سے زیادہ لوگ ٹیکس نیٹ میں آنے میں ترغیب محسوس کریں۔ انہوں نے کہا کہ چیمبر نے بہت پہلے تاجروں کیلئے فکسڈ ٹیکس کی تجویز دی تھی اورموجودہ حکومت کی طرف سے اس پر غور کرنا ایک حوصلہ افزا پیش رفت ہے۔ انہوں نے کہا کہ تاجروں کی مختلف کیٹیگریز بنائی جائیں اورن کی ٹیکس ادا کرنے کی صلاحیت کے مطابق ان پر فکسڈ ٹیکس عائد کیا جائے تاکہ کسی پر غیر ضروری بوجھ نہ پڑے۔

مرکزی انجمن تاجراں کے صدر اجمل بلوچ نے کہا کہ فکسڈ ٹیکس نظام کا نفاذ ایک بہتر تجویز ہے تاہم انہوں نے کہا کہ تاجروں کو یہ آپشن دیا جائے کہ جو پرانے نظام کے تحت ٹیکس ادا کرنا چاہتا ہے وہ اس کے مطابق ٹیکس دے اور جو فکسڈ ٹیکس نظام میں آنا چاہتا ہے وہ اس سے استفادہ حاصل کرے۔ انہوں نے مزید کہا کہ حکومت سالانہ ٹرن اوور پر بھی فکسڈ ٹیکس عائد کرنے پر غور کرے۔ وفد کے دیگر اراکین نے بھی تاجروں کے ٹیکس مسائل کو حل کرنے اور ٹیکس نظام کو بہتر کرنے کے بارے میں اپنی تجاویز دیں ۔ اس موقع پر اس بات پر اتفاق کیا گیا کہ فکسڈ ٹیکس نظام کے بارے میں تاجربرادری سے مزید مشاورت کی جائے گی تا کہ ایسا ٹیکس نظام لایا جائے جو ٹیکس کی بنیاد کو وسعت دینے اور ٹیکس ریونیو کو بہتر کرنے میں معاون ثابت ہو۔